MGA GINIKANAN IYANG INSPIRASYON
Tulo ka adlaw sa wala pa ang board exam, naadmit sa tambalanan si Harold Pacaña, tungod sa bacterial infection.
Gatuo ang 20-anyos nga lumad sa Barangay Tisa, dakbayan sa Sugbo, nga dili siya maka- take sa Certified Public Accountant (CPA) board exam niadtong Mayo.
Apan nianang adlaw sa exam, na- discharge siya sa ospital.
Samtang nagpadung siya sa pagkuha sa exam, gikulbaan siyag maayo,
Apan tanang sakrispisyo nagmabungahon human siya ang nahimong top 6 sa paggawas na sa resulta, diin nakakuha siya og grado nga 91%.
Isip bugtong anak, gihimong inspirasyon ni Harold ang iyang mga ginikanan.
Iyang amahan nga si Achilles, usa ka family driver samtang iyang inahan nga si Merly, caretaker usab sa balay sa pamilya nga gialagaran sa iyang amahan.
Nigradwar si Harold isip summa cum laude sa University of San Jose – Recoletos sa kursong accountancy.
Engineering unta ang unang gusto ni Harold nga kurso sa kolehiyo, apan tambag sa mga nahimong magtutudlo niya nga mag accountancy tungod kay aduna kini talento sa Math.
“Una, akong mga high school teachers mao juy nagpaila ila nako ani nga kurso. Since elementary, akong pangandoy jud kay mahimong engineer pareha sa akong uncle. Pero ana akong teacher nga maayo man daw kog Math, pwede daw mag- accountancy ko.”
Lakip usab sa nitambag niya iyang ginikanan tungod kay ang mga anak sa pamilya diin sila nagtrabaho, sagad mga CPA’s.
“Then niana akong mama ug papa nga dali ra daw ilang trabaho kay igo ra daw mupirma og documents, dako na daw og kwarta makuha,” matod pa ni Harold.
“Pero wrong sila tanan. Kay ang accountancy dili jud siya Math. More on analysis man jud siya, basic Math ra jud ang need sa kurso.” Human makagradwar si Harold ug nag- top sa CPA board exam, anaa na siya karon nagtrabaho sa usa sa sikat nga auditing firm nga Sycip Gorres Velayo & Company (SGV & Co.) isip isa ka associate auditor.
Gawas sa pagtungha ni Harold, siya usab ang presidente sa youth sa ilang simbahan sa San Lorenzo Ruiz Parish sa Tisa ug sa Youth Task Force sa barangay.
“I think, napossible ra ang tanan tungud sa mga tawo nga nitabang ra pud nako. And of course, naa ra pud akong mga ginikanan nga todo suporta sad sa mga ‘advocacies nako sa life’.”
Plano na ni Harold nga mag- master’s ug mag- law.
Sa pagkakaron, nag- focus unsa siya sa pagtabang sa iyang pamilya karon nga nagtrabaho na siya.
Tambag ni Harold sa tanan nga dili babag ang kalisod sa kinabuhi aron maabot ang mga pangandoy nga gilauman.
“Bitaw, di man kinahanglan nga bright jud ka para masuccesful jud ka, diskarte lang gud og salig sa Ginoo, enough na jud na!” /