NBP malimpyo gyud kaha?

Daghang nakadayeg niining subsob ug inisog nga kampanya ni Presidente Rodrigo Duterte batok sa naghitak nga gidiling drugas dinhi sa nasod. Gikan sa pagsugod niya og lingkod sa iyang katungdanan, iyang gituman ang iyang gipanaad atol sa kampanya nga mao ang hingusog nga pagpakigbatok sa illegal drugs.

Tuod man, sa sayong bahin, gisaway si Duterte sa iyang sayo nga kampanya tungod kay giingon nga mga gagmay ug mga piso ug ubos lang nga mga tigpayuhot sa gidiling drugas mao ray iyang gipanghipos.

Pero kining nahitabo karon sa pamilya ni Ozamis City Mayor Reynaldo “Aldong” Parajinog, ang naila ug gihulagway nga untouchable sa gobiyerno, mora og bunga o tubag sa pamunoan ni Duterte ngadto sa iyang mga kritiko.

Si Parajinog maoy ikaduhang mayor, sunod ni Mayor Rolando Espinosa sa Albuera, Leyte nga giingong usa sa mga dagkong tigpayuhot sa gidiling drugas nga natipi sa mga tinugyanan sa balaod ubos sa pagpakiggubat ning administrasyon batok sa drugas.

Gawas sa mayor, nalakip usab ang iyang asawa, igsuon ug laing 14 ang napatay atol sa ronda sa mga tinugyanan sa balaod niadtong Dominggo sa buntag sa ilang panimalay.

Timaan kini nga anaa na sa hugot ug seryuso ang Presidente sa iyang gisaad sa mga tawo ug bisan kinsa, mapulitiko ka man ug ma-negusyante.

Pero ning bag-ohay lang, mihimo na usab og operation ang mga tinugyanan sa balaod sa New Bilibid Prison aron kunohay pagtubag sa giingong nagpadayon nga negusyo sa illegal drugs sulod sa National Bilibid Prison.

Pipila na kahigayon na kining gihimo sa atong mga tinugyanan sa balaod pero mora man og nagbalik-balik ra gihapon ning problemaha.

Kagamay sa maong dapit, pero salikwaot paminawon nga dili makadulot ang hugot nga kampanya sa Presidente.