Mapuhag na kaha ang Kuratong Baleleng?

Nunot niining kamatayon ni Ozamis City Mayor Reynaldo "Aldong" Parojinog, mapuhag na kaha ang gika-intapan nga Kuratong Baleleng Gang (KBG) labi pa ang ilang illegal drug activity? Si Mayor Parojinog gikatahong maoy giilang "godfather" ning maong sindikato.

Napatay si Mayor Parojinog apil ang iyang asawa, igsuon ug 14 ka mga tawo sa dihang nakigpinusilay ang ilang mga armadong tawo sa mga pulis nga mi- serve og search warrants sa ilang mga panimalay sa San Roque, Lawis niadtong Domingo sa kadlawon.

Nadakpan si Vice Mayor Nova Princess Parojinog Echavez, anak sa mayor, ug ang laing anak nga si Konsehal Reynaldo "Ardot" Parojinog Jr. Ang kapulisan nga mironda sa panimalay sa mga Parojinog gipanguluhan mismo sa hepe sa Ozamis City Police Office nga si Chief Inspector Jovie Espenido nga adunay back up gikan sa CIDG 10 nga nagbase sa Cagayan de Oro City.

Si Espenido mao usab ang mironda sa panimalay ni anhing Mayor Rolando Espinosa Sr. sa Albuera, Leyte, amahan sa giilang drug lord sa Region 8 nga si Kerwin Espinosa.

Ang Kuratong Baleleng nagsugod isip anti-communist group niatong dekada 80 didto sa Misamis Occidental. Kontrolado ang maong grupo kaniadto sa militar. Si Octavio ‘Ongkoy’ Parojinog Sr., amahan ni Reynaldo, mao ang founder sa maong grupo. Sa dihang nagkahuyang na ang insurgency, ang KBG nahimo nang organized criminal syndicate ug nahilambigit na sa pagpanulis og mga bangko, kidnapping, protection racket ug illegal drugs.

Sa dihang namatay ang ilang amahan, kini na si Aldong ang misunod isip lider sa grupo. Ang iyang laing igsoon nga si Renato napatay sa mga awtoridad. Hangtod nga misulod sa pulitika si Aldong ug misamot ang iyang pagkagamhanan sa Ozamis City. Apil siya sa listahan ni President Rodrigo Duterte sa mga narco-politicians. Bisan pa man sa warning sa Presidente nagpadayon gihapon siya sa iyang illegal nga binuhatan. Ning iyang pagkamatay, mapuhag na kaha ang gi-intapan nga KBG? Kinsa na pod kaha ang isunod nga narco-politician o druglord?