Drug lords, undang na mo
Duda. Di ni pagsaway sa atong kauban sa buhat nga taga Manila, apan sa press conference ni PNP Chief Bato dela Rosa kagahapon ilang gipagawas nga og asa ma- assign si Chief Insp. Jovie Espenido dunay mamatay nga mayor.
Si Chief Inspector Espenido maoy hepe sa kapulisan sa Ozamis City diin gi- raid sa CIDG ug patay ang pamilya ni Ozamis City Mayor Reynaldo Parojinog gawas ni Bise Mayor Nova, nga anak ni Reynaldo nga misurrender. Miabot na sa 15 ka tawo ang patay.
Gipagawas usab sa Manila media nga sa pagraid ug patay ni kanhi Albuera Mayor Rolando Espinosa sulod sa prisohan nga ang CIDG ang nagbira si Chief Inspector Espenido, ang hepe sa Albuera Police niadtong nga higayon.
Gani, nahimuot lang si PNP Chief Dela Rosa sa pagtubag sa maong mga pangutana. Gipasabot ni Chief Bato nga CIDG ang nagraid sa pamilya Parojinog pinaagi sa search warrant nga gi-isyu sa korte sa Manila ug dili si Espenido.
Dunay usa nga nangutana og asa ibalhin si Espendio nga dapit human sa pagraid sa pamilya ni Parojinog. Apan gibarogan ni Chief Bato nga dili ibalhin si Espenido sa lain nga lungsod. Si Espenido gihapon ang hepe sa Ozamis city police.
Pagkalouy sad ni Espenido nga pakasad-on sa Manila media nga di siya o ang iyang ginsakpan sa Ozamis City Police ang nagbuhat o nagraid sa pamilya ni Parojinog.
Ang nahitabo sa pamilya Parojinog nagpakita lang nga ang panggamhanan ubos ni Presidente Duterte way gisanto o gikahadlokan.
Matod ni Chief Bato nga ubos sa administrasyon ni Duterte ilang ipatuman ang balaod sa way gipili o gipaboran.
Gipasabot usab ni PDEA 7 Director Yogi Filemon Ruiz ngadto sa mga pulitiko nga dunay koneksyon o protektor sa mga drug lord or dealer nga mobiya na samtang duna pay panahon kay ang nahitabo ni Parojinog posible nga mahitabo kanila.
Si kanhi Mayor Parojinog maoy usa sa mga pulitiko nga ginganlan ni Presidente Duterte nga drug protector atol sa iyang speech human sa iyang paghurar nga presidente. Si Daanbantayan Mayor Vic Loot apil sad sa lista ni Presidente Duterte.
Apan matod ni Mayor Loot na cleared na siya sa central office sa CIDG sa akusasyon nga usa siya ka drug protector. Sa usa ka interview, gipasabot ni Mayor Loot nga tungod sa clearance iya na maipadayon ang iyang tourism project sa lungsod.
Di ba si Presidente Duterte unta ang angayan mosulti nga cleared na si Mayor Loot?