`AshLoyd’ movie overloaded sa kilig
Way duda, maximum overloaded sa kilig ang bag-ong pelikula nilang Sarah Geronimo ug John Lloyd Cruz nga “Finally Found Someone.”
Maorag hapit kada scene naa gyud silay pagilok sa audience ug mga bag-ong komedya nga maoy nagda og labok nganong patok na sad sa box office ang tambalang AshLoyd.
Sama pananglit kadtong naa sila sulod sa restaurant samtang si Sarah nagtan-aw sa menu. “Ang mahal pala ng pagkain dito,” komento pa ni Sarah.
Matod usab ni Loydie, “may espesyal sila rito na wala sa menu.” Natinga ang dalaga ug nangutana: “alin?”
“Ako…” tubag ni Loydie. Char kaayo pero ang mga nanan-aw puwerteng sabaa.
SARAH UMEEGAT NA
Usa sa mga pinakakilig nga scene kadtong padung na silang maghawok ug gipatara na ni Sarah ang iyang ngabil nga gi- background- nan sa kantang “ahhhh, minahal kita agad… ahhhh, minahal kita agad… ipagpatawad mo ohh.”
Ang version ra ba gyud ni Vic Sotto ang gipatukar nga igat kaayo paminawon. Di na lang ko mag- tell unsay nahitabo kay basin wa pa mo kita mapalaw unya mo.
Basta the same formula ra siya sa nangagi nilang tulo ka mga pelikula, apan mas palaban lang karon ang Sarah sa mga gakosgakos ug hata-hata nga hawok ni John Lloyd mao tingaling mas lingaw ni karon.
`KITA KITA’ NAKIGTIGI
Bilib sad ko sa “Kita Kita” nilang Empoy ug Alessandra de Rossi kay bisan showing na ang pelikula nilang Sarah ug John Lloyd, padayon gihapong gipilahan ang ilang pelikula sa ikaduhang semana sa takilya.
Sama sa “Finally Found Someone,” duha sad ka sinehan ang nagpasalida og “Kita Kita” sa SM City Cebu niadtong Dominggo.
Kinsay magtuo nga sa P10 million nga budget, mokita og P200 million ang “Kita Kita” in less than two weeks. Wow!
PATAY NA SI HESUS
Akong nahinabi ang mga Bisaya nga artista sa “Patay na si Hesus” nga silang Chai Fonacier, Vincent Viado ug Melde Montanez. Sila ang modala nga mga anak ni Jaclyn Jose sa maong comedy-drama movie.
Ang “Patay ng si Hesus” ang bugtong Cebuano film nga nalakip sa 12 ka mga pelikula sa Film Development Council of the Philippines alang sa unang Pista ng Pelikulang Pilipino, nga ipasalida sugod karong August 16, 2017 sa tibuok Pilipinas. Basaha ugma, Miyerkules, ang estorya nilang Chai ug Melde sa atong Ssssuper Ka!