I’ve grown enough

TEEN ROMANCE

Mitupad paglingkod si Ate Renren nako. Seryuso siya nga mikupot sa duha ko ka kamot.

“Di puppy love ning gibati ko kang Jonar, Te. Wa man gani ko motawag niyag Kuya kay nagtuo ko nga siya ang laki nga akong destiny.” “Ayaw pada’a sa imong feeling niya, MayAnn. Tan-awa unya, di ba kon madugay na, di ka na makagusto niya. Lumalabay lang ning pagbating puppy love, uy!”

Gusto kong ipakita kang Ate Renren nga nasayop siya sa iyang pagtuo.

“Ipakig-away ko ning gibati ko kang Jonar, Te.”

“Look, MayAnn, batanon ka pa kaayo, uy. Di ka pa angay mobati ana kay makadaot kini sa imong pag-eskuwela. Himoang priority ang imong studies ug ayaw anang giingon mong true love.”

“Basta love gyud nako si Jonar, Te.”

Mitindog si Ate Renren. Mibalik siyag higda sa iyang kama. Namatikdan nako nga nasuko siya. Wa na siya magtingog. Naghilom na lang ko hangtod nga nakatulog ko.

Pagka buntag, wa na si Ate Renren sa among kuwarto. Paggawas pa nako, nahibawko nilang Mama ug Papa nga sayong miadto sa eskol si Ate. Miyangu-yango ko ug misulod ko sa banyo aron maligo. Igo lang kong miinom og gatas ug mikaon og pipila ka sliced bread nga gipresan kog hotdog.

Miadto na ko sa eskuwelahan ug gibiyaan ko sila si Mama ug Papa nga nangandam na sab sa pagpaingon sa tagsa-tagsa ka opisina nga ilang gitrabahoan. Dagkog posisyon ug suweldo sila si Mama ug Papa. Haruhay ang among pag-eskuwela ni Ate Renren labi na kay duha ra ming magsuon. Milargo ko sa akong classroom. Sayo ang akong klase matag buntag, gikan sa Lunes hangtod sa Sabado. Nianang pagka nine o’clock, miadto ko sa school canteen aron mamahaw. Gigutom ko. Mao ni ang akong naandan. Anhi ko mamahaw sa canteen sa eskuwelahan.

Wa ko makadayog sulod sa canteen kay nakita ko sila si Ate Renren ug Jonar nga nangaon sa usa ka lamesa. Nasabtan nako nga samtang nagkaon sila, seryuso silang nag-estoryahay. Nakalingi si Ate nako. Iya kong gipahiyoman. Mipahiyom sab ko niya ug mipadayon kog sulod sa canteen.

Managkaila diay sila si Ate Renren ug Jonar? Nakaingon ko sa hilom.

( SUMPAYAN)