Ang kapalaran ni sindangaw

Dili Sindangaw ang tinuod niyang ngalan, kundili Merculito. Gianggaan siyag Sindangaw sa kadaghanan gumikan sa talagsaon niyang katas-on, aw, kamub-on diay. Tiawmoy bayenti-uno na siya, unya wa kaabot og lima ka dangaw ang iyang gitas-on!

Hinuon bisan sa iyang kamubo dili siya parehas sa ubang inano nga puruko. Proporsiyon ang iyang lawas ug ambungan siyang sud-ungon. Gani dihang nagpa-piktyur ang ulitawo ug gipadala sa dalaga nga iyang nauyab sa selpon, abi niini nga artista siya sa telenobela magabii. Pero, dihang nagkita sila sa personal hapit kuyapi ang babaye kay gipakaingon niini nga duwende si Sindangaw. Way pananghid siyang gibulagan.

Labihang guola ni Merculito (Sindangaw). Unsaon na lang niya kining iyang kahimtang? Kaniadto iyang nahibaloan sa iyang ginikanan kining pagka dili niya normal nga pagkatawo. Matod nila resulta kini sa usa ka maldisyon. Kay matod pang tatay niya Temistokles, kaniadto nakauyab siyag engkantada, si Buenaventorada. Apan iya kining gibulagan ug maoy giminyuan si nanay niya Anastacia. Puwerting sukoa sa engkantada nga miyamyam og maldisyon, “Tungod sa imong paglimbong kanako, kini ang timan-i, Temistokles, ang una nimong anak himuon kong pandak! Mahibalik lang ang normal niyang pagkatawo kon mahagkan siyag babaye nga tinuod nga magpangga ug magmahal kaniya!”

‘Apan kinsa kahang bayhana ang maantigong mopangga ug magmahal kanako, kon makakita na sa akong panagway sa personal?’ sukot niya sa iyang kaugalingon.

Usa ka adlaw masulub-on si Merculito nga nanamilit. “Tay, Nay, molakaw ko. Magpahilayo dinhi sa ato. Pangitaon ko sa ubang suok ning kalibutan ang akong kapalaran.” malimbation nga namulong si Merculito.

Nasubo si Temistokles ug si Anastacia, apan wala nila hawiri ang anak. Gihangad na lang nila sa Kahitas-an ang kapalaran niini.

NANGLABAY ang katuigan. Wa na igdungog sa mga tigulang kon unsa nay gidangatan ni Sindangaw. Unya usa ka hapon niana, hapit mahagbong sa sanggutan si Temistokles sa kahikugang pagkakita niya sa tawo nga naglakaw paingon sa ilang pinuy-anan. May kauban kini, usa ka batan-on ug maanyag nga babaye.

“Tasya! Tasya! Pagdali! Ari diri!” misinggit si Temistokles.

“Ngano, Tokles? Naunsa ka?” ni Anastacia nga nahasulpot gikan sa kusina. Ug nahasiga ang iyang mga mata nga nakalantaw sa duha ka tawo nga naglakaw paingon kanila. “Tokles, di ba si Sindangaw kana? Apan...”

Daw dili sila makatuo sa ilang nakita. Ilang naaninaw nga usa na ka hingkod nga tawo si Sindangaw. Dili na inano. May gitas-on na kini nga duol sa unom ka tiil ug pabilin ang maayog pagka bagay sa lawas ug kaambungan sa panagway niini.

“D-Dong... Ikaw si … Sindangaw?” ni Temistokles.

“Oo, ako kaayo, Tay. Apan dili na Sindangaw. Ako gayud si Merculito,” ni Merculito nga nagkatawa.

“Kon mao, Dong, nakalingkawas ka na sa maldisyon ni Buenaventorada?”

“Oo, Tay. Pero taas ang sugilanon. Ug tuod,” gilingi ni Merculito ang kuyog nga dalaga, “siya si Aleah, akong hinigugma. Siya ang binuhat nga tinuod nga nagpangga ug nagmahal kang Sindangaw!”

Wa makatingog ang mga tigulang niyang ginikanan. Apan didto sa ilang mga panagway milutaw ang dili ikahulagway nga kalipay.