Ironman organizer midemanda og public apology ni Santillana

Organizer sa Cobra Ironman 70.3 Philippines nga ipahigayon karong Dominggo dinhi sa Sugbo miklaro nga dili sila ang misaad nga mohatag og P300,000 ngadto sa Manipis Elementary School sa Talisay City agi'g donation.

Sa suwat nga gipadala sa Sunrise Events, Inc. ngadto ni Alvin Santillana, City Disaster Risk Reduction and Management, ug ning pamantalaan ilang giklaro nga dili sila ang misaad niini kon dili ang Asia Brewery Inc. nga maoy ilang title sponsor.

Gani wala sila magkakita ug makigsabot sa mga opisyal sa tunghaan, apan sa ilang gihimong pakisusi andam na ang tseke ug gikatakda na kining ihatag.

Apan gumikan sa maong report daw sa nabati ang imahen ang ilang kompaniya.

Nalatid sa maong suwat nga gipirmahan ni Santiago A. Polido, ilang corporate secretary, nga kinahanglan nga mo-isyug pamahayag si Santillana sa sayop niini gipahibawo.

Ang SEI nagkanayon nga dili makiangayon nga sila ang basulon sa pagkalangan sa paghatag sa donasyon nga wala man silay labot sa maong kasabotan.

“If you fail or refuse to do, as required, we will be constrained to refer this matter to our lawyer for appropriate legal action,” matod sa ilang duwat. Una niini si Mayor Gullas mipahibawo nga wala siya makakita sa rekomendasyon ni Santillana, apan miklaro nga wala siyay plano nga mobakwi sa permit nga iyang gi-isyu sa Ironman.

Una niini migawas ang report nga moduso og rekomedasyon si Santillana, pangu sa City Disaster Risk Reduction and Management nga bakwion ang permit nga gihatag sa organizer sa Ironman nga sirhan ang usa ka lane South Coastal Road habig sa Talisay.

Kini human nga aduna’y saad ang organizer kaniadto nga hangtud ron wala pa gyud kini matuman.

Matod pa, niadtong 2015 nga Ironman ang organizer nipasalig nga mohatag og financial assistance sa tunghaan sa Manipis nga P300,000 apan hangtud karon wala pa’y bisan piso nga naabot sa maong tunghaan.