Danao City milangkat sa 1st PSC -Visayas netfest
Gilangkat sa Danao City ang duha sa upat ka gold medals sa singles event open category sa 1st Philippine Sports Commssion Central Visayas Invitationinal Tournament nga nahuman niadtong Dominggo sa SM City Consolacion Cinema Lobby.
Ang magsuong sila si Shaira ug Kathlyn Gabisay mao ang naghatag sa Danao og mga bulawan sa torneyo nga gipasiugdahan sa Philippine Sports Commission (PSC) for the Visayas nga pinangulohan ni Commissioner Ramon Fernandez ug Philippine Sports Institute (PSI) for the Visayas.
Si Shaira, 12, maoy nipatigbabaw sa 12 and under girls category samtang si Kathlyn, 16, maoy nikampiyon sa 17 and under girls division.
Ang nakaangkon sa silver medal sa 12 and under girls mao si Trishamae Ramoneda sa Danao City samtang nagbahin sa bronze medal sila si Kolina ug Jamaica Labrador sa Consolacion.
Si Aizel Mae Ron sa Cebu City maoy mikuha sa silver medal sa 17 and under girls samtang nagbahin sa bronze medal sila si Damecess Castil sa Tagbilaran City ug Clare Derecho sa Danao.
Milabni sa gold sa 17 boys and under mao si Keiran Pinili sa Lapu-lapu, silver medalist si James Tampus sa Lapu-lapu samtang nagbahin sa bronze sila si Loyd Labasala ug Jayvee Asong, pulos sa Danao.
Misakmit sa gold sa 12 and under boys mao si Jebb Jerwin Datahan sa Tagbilaran, mikuha sa silver mao si Antio Gabi sa Cebu samtang nagbahin sa bronze sila si Daniel Butar sa Mandaue ug Clifford Tormon sa Consolacion.
Sa executive division, ang gold winner mao si Robert Arteche sa Tagbilaran, silver medalist si Roverick Ang sa Cebu ug bronze si Bill Yap sa Mandaue.
Ang mikampiyon sa team event mao ang Huaching Team A, silver ang University of Cebu ug bronze ang JOTTC Team A.
Ang kompetisyon tipik sa grassroots development program sa PSC ug PSI alang sa pagkaplag og mga atleta nga adunay potensyal nga makahatag og dungog sa nasod sa nagkadaiyang international competition.