ABUEVA MISSING?
Semana na lang kapin sa dili pa sugdan ang Fiba Asian Cup apan hangtod karon wa pa gyuy klarong praktis nga nahimo ang Gilas Pilipinas gumikan kay permi kini dili makompleto sa ilang lineup.
Niadtong Domingo sila si June Mar Fajardo, Jayson Castro, Gabe Norwood, Raymond Almazan, Carl Bryan Cruz, Roger Pogoy ug ang Fil-German nga si Christian Standhardinger ang mitambong sa ilang gikatakdang ensayo sa Upper Deck Gym sa kaulohan.
Apan sila si Calvin Abueva ug Jio Jalalon ang wala makatunga. Gani ang gitawag og “The Beast” nga Abueva, wa gyud makapraktis sukad ang team nga molarga nakarong petsa otso ning buwana mipahigayon sa ensayo sa niaging semana. Kini maoy nakapaaghat ni coach Chot Reyes sa pagpahimangno ni Abueva nga ilisan kini kon dili gyud motunga sa ilang praktis.
Ang pambato sa Alaska Aces sulod na sa upat ka mga higayon nga wala motunga sa praktis sa Gilas ug wala kini mohatag og klarong rason.
Ang gitawag og “The Beast” wala sab motunga sa duwa sa Alaska batok sa Star Hotshots sa Philippine Basketball Association (PBA) Governor’s Cup niadtong Biyernes.
“If he doesn’t come by tomorrow (karon), we’re going to be forced to drop him,” asoy ni Reyes sa interbyu sa Spin.ph kagahapon. “We have no other recourse.”
Gipasabot ni Reyes nga wala pa siya’y nadungog nga pamahayag gikan kang Abueva.
“Wala pa ring balita eh. Kino-contact through Alaska, through their team manager, pero wala. There’s no news,” batbat ni Reyes.
Ang wala pagpakita ni Abueva lain na sab ang kakulian alang sa national team, nga kuwang nang daan og preparasyon.
Si Terrence Romeo, Japeth Aguilar ug Matthew Wright pulos usab mipalta apan kini gitugotan tungod kay ang ilang tagsatagsa ka mga team aduna may duwa niadtong Dominggo sa PBA Governor’s Cup sa Smart Araneta Coliseum.
Walo ka adlaw na lang gikan karon mosugod na ang Fiba Asia Cup. Samtang ang laing grupo sa Gilas team nga moduwa sa Southeast Asian Games ang perming makompleto sa ilang ensayo. Hinuon sila lang si Baser Amer ug Troy Rosario ang perming makapalta.
Perming makatunga sa praktis nga gidumala ni Reyes ug coach Jong Uichico mao sila si Rayray Parks, Jr., Raymar Jose, Kiefer Ravena, Mike Tolomia, Ed Daquioag, Kobe Paras, Von Pessumal ug Almond Vosotros.
Si Marc Belo ang naka-standby karon nga posibling ilakip sa Gilas.
Diha usab ang British coach nga si Tim Lewis.