Suporta sa publiko
Dunay unang mga pagsaway nga gagmay lang nga mga isda sa nakuha sa lit-ag sa hugot nga kampanya sa pagpayuhot sa gidiling drugas sa nasod ni Presidente Rodrigo R. Duterte, lakip ang human rights groups ningpadayag sa ilang kabalaka sa daghang biktima mga kabus sa ilang gitawag nga duguong kampanya sa administrasyon.
Sa tinuod nga kahimtang, dili bastabasta ug sayon ang pagrumbo sa mga dagkong isda kinsa dunay igong kapasidad nga mosukol sa legal nga hawanan ug linuog nga pamaagi. Dunay salapi nga magasto sa dalit sa pag-ipsot sa sulod ug gawas sa nasod. Labaw sa tanan, sila dunay dakong impluwensiya sa komunidad human nanaghupot ang uban kanila og dagkong lokal nga posisyon sama sa pamilyang Parojinog sa dakbayan sa Ozamiz ug lalawigan sa Misamis Occidental.
Apan walay kahadlok nga pagronda sa balay sa mayor sa Ozamiz niadtong Dominggo sa kaadlawon hinungdan sa kamatayon ni Mayor Reynaldo Parojinog, iyang asawa nga si Susan, igsuong provincial board member ug uban pa ug ang pagkasikop usab sa bise mayor nga nagbansagon usab og Parojinog. Nangayo sila og hustisya sa kamatayon sa ilang mga sakop sa pamilya.
Timailhan na ba kini nga gitutokan ni Duterte ang dagkong isda sa sindikato? Kadtong nakasaway nga gagmay nga isda lang ang naapektohan, panahon na kini karon nga suportahan ninyo ang presidente.
Kagahapon, ang wala mamatay nga isyu nga bahin ni Peter Lim sa Sugbo ug kang Kerwin Espinosa isip dakong isda sa ilegal nga druga sa nasod misibaw og balik human gisilbi ang warrant batok kanila kagahapon. Hinuon, malinawon kini.
Ang kampanya sa gidiling druga dili lang responsibilidad sa presidente ug awtoridad, ang komunidad o publiko dakong bahin sa iyang kalamposan ug mao ang nag-unang makabenepisyo sa resulta sa malinawong palibot nga luwas sa druga.