Kinsay sunod?

Para nako grabe ra sab ang gihimo sa kapulisan atol sa gihimong pag raid sa compound sa panimalay ni Mayor Reynaldo Parojinog sa Ozamiz City.

Kon imong tan-awon, di lang rubout kon dili usa ka matang sa pagmasaker nga miresulta sa kamatayon sa 15 ka mga tawo.

Dili tiaw nga napatay ang mayor, board member, sakop sa media, ubang mga opisyal nga naglakip sa mga sibilyan

Bisan pa ug moingon ang kapulisan nga legitimate ang

operation basi sa search warrant, legal ba diay ang pagpatay sa mga biktima?

Kon atong basihanan ang pamahayag sa survivor sa ngilngig nga pagpatay sa Ozamiz City makaingon ta klaro nga giplano.

Gani mao kini ang gibutyag ni Senator Antonio Trillanes, ug pipila ka mga senator ug ang mga eksperto.

Matod sa survivor gitapok sila sa usa ka lugar ug unya giitsahan ug granada. Gipamusil ang mga buhi ug nagpa patay patay ang saksi.

Kon ibutang nato nga dunay misukol nganong giapil man pag patay ang dili armado.

Upat o ngadto sa lima ang nakuhang armas ug nganong miabot man sa 15 ka mga tawo ang nangamatay.

Kon gituyo ug giplano ang pagpatay ni Mayor Espinoza sa Albuera, Leyte nga gisud sa prisuhan sa mga sakop sa CIDG-8.

Morag mao raman gihapon ang pamaagi. Apan mas grabe ka brutal ang nahitabo sa pamilyang Parojinog.

Dinhi sa Sugbo, dunay hungihong nga ang isunod mao si Peter Lim, ang dakong negusyante ug gipasanginlan ni ni Presidente Rodrigo Duterte nga sakop sa Triad.

Ang Triad maoy nagkontrolar sa sindikato sa drugas sa Asia.

Ang mga pulitikong giakusahan nga protector wa mabalaka sa nahitabo. Sa pagtuo nga inosente sa mga pasangil batok kanila.

Way lalis notado na sa bisan unsang krimen si Mayor Parojinog. Apan anaa kitay balaod nga angayang sundon.