Kapalaran ni Frank

Wa nay misa nga naabtan si Frank paghiabot niya sa simbahan sa St. Francis of Assisi karong buntaga. Nahimo na niyang tulumanon matag adlaw ang pagsimba gikan nga managat. Dili niya igsapayan ang kalapoy sa iyang lawas.

Ilado si Frank dinhi sa barangay Pulo nga reliyuso. Bisan unsang orasa siya moabot gikan sa panagat di niya bation ang kaluya nga moadto sa simbahan. Matag Dominggo ra silang pamilya nga maguban sa pagpanimba.

Dugay nga miabot si Frank gikan sa panagat karong buntaga. Dugay nadispatsar ang daghang kuha niyang isda. Mga negusyante sa isda nga misugat nila sa lawod dugay nga namayad.

“Frank, pauli unya dayon kay aduna kay bisita nga moabot,” taho ni Yoling nga iyang asawa.

“Kinsa man tawon, Yoling, ang mamisita nako?” usisa ni Frank.

“Miabot kagabii ang imong ig-agaw gikan sa siyudad ug misugilon nga moanhi ang manghod nimong nars nga nagtrabaho sa Amerika, kauban sa bana niyang doktor,” dugang taho sa iyang asawa.

Nakugang si Frank sa taho ni Yoling. Dili siya makatuo nga ang manghod niyang nars nga si Adela uban sa iyang bana nga si Doktor Boy mobisita sa ilang balay. Nahinumdom si Frank nga sa daghang higayon nga nagbakasyon ang iyang manghod dili kini molahos sa pagpauli dinhi sa yuta nilang natawhan. Kutob ra sila si Adela ug ang iyang bana panimalay sa duha nila ka igsuon nga nagpuyo sa Siyudad sa Sugbo.

Sa daghang higayon nga mibakasyon si Adela di gyud kini mobisita kang Frank ug adto na lang kini niya mahibaw-i inigbalik na nila sa Amerika. Nahibawo sab si Frank nga sa matag bakasyon ni Adela, sadya usab ang duha niya ka mga manghod uban sa ilang pamilya. Manuroy sila sa Boracay ug sa ubang turismong mga lugar dinhi sa Pilipinas.

“Daghang higayon nga mibakasyon si Adela, Frank, dili man gyud ta paapilon sa ilang kalipay?” sa asawa ni Frank niadtong ulahing pagbakasyon sa iyang igsuon duha ka tuig na ang nakalabay.

“Siguro. gikauwaw ko sa akong mga igsuon, Yoling. Pagtong man gud ang akong panit tungodsa dagat. Ug silang tulo pulos na propesyonal. Samtang ako usa lang ka mananagat,” may pagmahay ang tingog ni Frank.

Si Frank maoy una sa duyan nilang upat ka igsuon. Siya maoy nakasunod sa bakos sa iyang amahan sa dagat. Misaad siya sa iyang amahan nga dili pasagdan ang pag-eskuyla sa iyang mga manghod hangtod mahuman ang kursong gipangandoy.

“Sagdi lang, Manoy Frank, human unya namo matapos ang among kurso, magtinabangay kami sa imong kalampusan,” pasalig sa iyang mga igsuon kaniadto.

Apan ang mga saad sa iyang mga igsuon napadpad sa hangin. Tagsa-tagsang naminyo ang iyang mga manghod matag human sa ilang kurso nga gikuha. Gikalipay gihapon ni Frank ang nahitabo. Napakita niya sa iyang amahan ang katumanan sa iyang saad.

“SALAMAT ninyo, Adela, sa pagduaw sa kabos namong balay,” ni Frank nga migakos kang Adela.

“Pasayloa ko, Manoy Frank! Wa man gud ko hatagig panahon sa atong mga igsuon sa pagbisita nimo niadtong nangagi namong bakasyon. Busa ania kami si Boy aron hulipan ang among pagkulang. Aniay Diyes Mil dolyares, Manoy, tingob sa daghang panahon sa among pagbakasyon nga wa koy natunol nimo,” ni Adela nga luhaan ang mga mata.

(KATAPUSAN).