MGA KONTRABANDO.

Mao kini ang nagliundok nga mga butang nga nasakmit sa Greyhound operation sa Cebu Provincial Detention and Rehabilitation Center (CPDRC) niadtong Agosto 1. Naglakip kini sa drugas ug cash nga nakuha gikan sa canteen sa prisohan. Hayan masirhan ang canteen tungod niini.

Human masakmit ang drugas, dakong kantidad sa kwarta ug mga gamit sa illegal swertres, canteen sa Cebu Provincial Detention and Rehabilitation Center (CPDRC) hayan sirhan.

Tukion kini sa panagtagbo karong adlawa sa mga sakop sa task force CPDRC sa Kapitolyo human daghang drugas ug uban pang kontrabando nasakmit sa labing uwahi nga greyhound operation.

Lakip sa tukion ang tinguha sa tagdumala sa CPDRC nga mataktak ang mga gwardiya nga kakunsabo sa pagpalusot niini ug ang posibleng pagwagtang na sa canteen o mas naila nga “coop”, diin nakuha ang mga pinakete sa gituohang shabu.

Hangtud karon, way niangkon kon kinsa ang tagiya sa drugas nga nakuha gikan sa usa ka egg tray sulod sa canteen nga mobalor og P236,000.

Nagduda si CPDRC officerin-charge, Bobby Legaspi, nga nagpadayon sa ilang negosyo sa ilegal nga drugas ang mga high-value target nga piniriso.

Wa hinuon siya motug-an kon pila kabuok ug kinsa ang mga tawo nga ilang gidudahan nga responsable sa pagpasulod sa drugas. Sila ang iyang gituohan nga pinanser sa ilegal swertres o masiao sulod sa prisohan.