LALAKE GASELOS, MAGSUON GILUBA

BABAYE NASAKPAN NGA DUNAY UYAB, GISUNG SA MANGINGIHAW

Lalake nga nagselos nidunggab sa iyang uyab ug igsuon niini kagahapon sa buntag sa dan Camomot, Brgy. Poblacion, dakbayan sa Talisay.

Ang suspek nga sabog ug hubog maghikog unta pinaagi sa paghigot sa iyang liog, apan wa siyay nakitang lig-on nga kahoy hinungdan nga naabtan siya sa kapulisan ug nadakpan.

Ang mga biktima giila nga si Arlene Alfanta, 46, giingong usa ka tomboy ug iyang igsuon nga si Felimina Alfanta, 48, pulos nagpuyo sa maong lugar.

Samtang ang gikatahapan mao si Emmanuel Yap, 39, mangingihaw og baboy, ilang silingan.

Base sa pasiunang imbestigasyon, sila si Arlene ug Yap adunay relasyon.

Kagahapon, samtang si Arlene didto sa balay sa iyang igsuon, niabot si Yap ug dayong dunggab sa makadaghan kaniya tumong sa tiyan.

Si Felimina nga diha atol sa hitabo niuwang apan mao na usay gidunggab ug naigosa bukton.

Human sa hitabo, daling nisibat si Yap samtang ang mga biktima daling gidala sa Talisay District Hospital.

“Nikalit man lang to siyag abot unya dunggab dayon. Kay naghigda raman to akong igsuon sa bangko,”asoy sa laing igsuon sa mga biktima nga di gustong nganlan.

Sa hot pusuit operation sa kapulisan, paglabay sa hapit usa ka oras, ilang nasikop si Yap sa usa ka balay nga wa nay tawo.

Si Yap wa na mosukol sa kapulisan human matuyoki ang ilang balay.

Sa dihang nasikop, aduna nay higot ang iyang liog ug si Yap nibutyag nga kon wa pa siya masikop sa mga pulis, maghikog unta siya pinaagi sa paghigot sa iyang liog.

“Wala man koy nakit-ang kahoy nga akong kahigtan kay sa akong gitaguan pulos man gabok ang kahoy,” matod ni Yap.

Si PO3 Stephen Sefuesca miingon nga base sa ilang pakisusi nagselos ang gikatahapan tungod kay dugay na silang uyab, apan iyang nasayran nga aduna usab diay kini gikarelasyon nga usa ka babaye. /