4 KA PULIS SA TALISAY GIKIHA SA DINAKPAN

Upat ka mga pulis nga sakop sa Talisay City Police Station gipasakaan og reklamo ngadto sa Office of the Ombudsman Visayas sa ilang dinakpan human giingong nikuha sa P200,000 nga kwarta ug giingong nitanom og mga ebidensiya batok kaniya.

Ang nireklamo mao si Robert Fernan, kinsa gidudahan nga maoy nirakrak sa Talisay City Jail niadtong Hunyo 26.

Mga ngan sa mga pulis gipugngan samtang wa pay habig.

Si Fernan, pinaagi sa iyang abogado nga si Salvador Solima, nisang-at og reklamong grave misconduct, grave abuse of discretion, dishonesty, oppression ug conduct unbecoming of police officers batok sa upat ka mga pulis.

Gi-alegar ni Fernan nga gipagawas sa mga pulis nga sa buy bust operation siya nadakpan niadtong Hulyo 7 apan matod niya, wa kini mahitabo.

Dihang niabot ang mga pulis pasado alas 9 sa buntag sa iyang balay, nagtan-aw, matod pa niya, siya og TV apan kalit siya nga gipahapa ug gipusasan sa nangabot nga mga pulis.

Human niini, gialegar niya nga nisulod ang mga pulis sa iyang kwarto ug gikuha ang iyang kwarta nga P200,000.

Gihimug-atan ni Fernan nga wa gideklarar sa mga pulis sa certificate of inventory nga duna silay nakuhang kwarta.

Dugang niya, nga human makuha sa mga pulis ang kwarta, gitamnan siya og ebidensiya sa iyang atubangan ug atubangan sa iyang asawa.

Lakip sa giingong tinanom nga ebidensiya ang shabu ug 9mm pistol.

Matod ni Fernan, ang dakong kwarta nga iyang gitipigan tinigom niya ug sa iyang asawa.