Mga pulis gitahasan pag-ila sa narco-politicians
Gitahasan ni Lapu-Lapu City Mayor Paz Radaza ang kapulisan sa pag-ila niadtong ubang opisyal sa Lapu-Lapu nga gihulagway nga narco-politician kon ugaling adunay nalambigit sa ilegal nga binuhatan.
Samtang siya nagtuo nga lehitimo ang operasyon nga gihimo batok ngadto ni Ozamiz City Mayor Reynaldo Parojinog ug kaubanan nga miresulta sa dugoong engkuwentro.
Masaligon si Radaza nga nihimo og pagtuon ang habig sa kapulisan ingon man sa pag- surveillance ngadto sa mga hingtungdan (Parojinogs).
“Akong reaction? Na- shock ko,” matod ni Radaza atol sa regular press conference.
Natagbaw sab si Radaza sa resulta nga gipakita sa kapulisan sa Lapu-Lapu sa ilang sagunson nga pagpatuman sa anti-illegal drug campaign.
“Kami sa ubang LGU’s tutok ra gyud mi sa among trabaho,” saysay sa mayor diin iyang gipahinumduman ang kapulisan sa pagdoble sab sa ilang pagpatunhay sa kahusay ug kalinaw.
Gihinganlan sa mayor ang barangay Mactan (Soong), Maribago (Looc) ug Pajo nga gihulagway nga aktibo sa pagronda sa illegal drugs gumikan sa mga dakop.
Ang city police office mimando ngadto sa ilang matag station commander nga mopahigayon og duha ngadto sa tulo ka pagpangronda samtang nagpadayon ang pag-agni niadtong nalambigit sa illegal nga drugas sa pagpatahan.
Gipaningkamutan sab ang pito ka mga barangay diin lima nahimutang sa isla sa Olango ug duha sa mainland nga gitiungha nga opisyal nga madeklarar nga drug free.