Senior, PWD nakadawat og wheel chair gikan sa Agak ni Guardo

Moabot ngadto sa 147 ka mga senior citizen ug persons with disability (PWD) ang bag-ong natabangan sa Agak ni Guardo.

Kagahapon, 47 ka mga lolo ug lola unya ang PWD nakadawat sa stainless wheelchair ug 100 ka sungkod nga pulos gikan sa nasod sa Japan atol sa pagpanghatag ni Konsehal Jerry Guardo nga giabagan sa Mizuki Enterprise ni Huruo Iwanaga, usa ka Japanese national apan Sugbuanon ug kasingkasing.

“Karong adlawa (kagahapon) gikalipay namo og dako nga daghan ang nitambong sa mga

senior citizen ug PWD, gaan kaayo ang maong kasingkasing nga nakatabang mi sa nanginahanglan,” matod ni Guardo.

Atol sa distribution, si Guardo giubanan sa iyang mga kaalyado sa Bando Osmeña Pundok Kauswagan (BOPK) nga gipangulohan ni Konshal Margot Osmeña, Sisinio Andales, Mary Ann de los Santos.

Si Juliana Villarin, 81, sa Barangay Kinasang-an di na makalakaw sanglit nadakdak ang iyang lawas usa sa mga nakabenepisyo sa programa.

“Nalipay ug nagpasalamat ako sa Kahitas-an nga natagaan ko og wheelchair,” padayag ni Juliana.

Si Jayme Dignos, 66, sa samang barangay kinsa nastroke gumikan sa sakit nga

diabetes nagpasalamat kang Guardo sanglit makasuroysuroy na siya gamit ang bag-o niyang gamit.

“Oh lipay kaayo og dako uy salamat pa gani,” padayag ni Dignos kinsa usa sa 47 ka mga benepisyaryo.

Si Guardo nagkanayon nga dul-an na sa 200 ka mga wheelchair ang iyang nahatag sukad iyang gilusad ang programa dihang siya pa ang kapitan sa Barangay Sambag I ug karon iyang ipadayon uban sa ayuda ni Iwanaga sanglit tuyo nila nga mahatagan ang mga lolo ug lola ug sungkod og wheelchair.