Angay i-turn over sa BJMP

Sa niaging pipila ka adlaw milusad og kinalit nga operation ang Philippine Drug Enforcement Agency (PDEA) didto sa New Bilibid Prison (NBP) sa Muntinlupa City. Duna man tuoy mga butang nga gidili unta sa sulod sa maong bilanggoan nga nasakmit apan maingon nato nga minus ang shabu nga ilang nakuha.

Siguro nibahar na og gamay ang negusyo sa shabu sa NBP o kaha maayo lang ang pagkatipig.

Niadtong Agosto 1, Martes, ang Cebu Provincial Detention and Rehabilitation Center (CPDRC) sa Barangay Kalunasan mao na usab ang gikalitan sa pagronda sa Provincial Drug Enforcement Unit (PDEU) nga ubos sa pagpangulo ni Chief Insp. Roland Aliser.

Susmaryosep. Way kalahian sa unang higayon. Naghitak diay gihapon ang gidiling drugas sa maong bilanggoan.

Gibana-banang moabot ngadto sa P236,000 nga balor sa shabu base sa Dangerous Drugs Board value ang nakuha atol sa ronda.

Kini nadiskobrehan sa usa ka egg tray sa pasilidad. Matod pa nga way kontrabando nga nakuha gikan sa selda sa drug lord nga si Alvaro “Barok” Alvaro, pero wa ni magpasabot nga way kalabotan si Alvaro sa kalihukan. Kinsay nasayod nga pantalya lang niya nga dili pabutangan og shabu ang iyang seldad.

Unya di lang kay drugs, nakakuha usab ang PDEU, inabagan sa Provincial Intelligence Branch ug PDEA-Central Visayas og mga salapi nga gituohan nga halin sa gidiling drugas ug duna usab diay illegal gambling sa sulod.

Di nato malalis nga ubos sa administrasyon ni Cebu Governor Hilario Davide III, dili lang kay kausa o kaduha nag-ilis-ilis og jail warden ang CPDRC mora man og way kausaban.

Buot ba ipasabot nga di kaya sa Kapitolyo ang pagpakgang niini?

Mas maayo pa siguro og i- turn over na lang ang pag manage niini ngadto sa Bureau og Jail Management and Penology (BJMP)?