Batig nawong

Magsugod mi sa among media literacy class sa usa ka

senior high diri sa syudad pinaagi sa paghisgot sa mga balita anang adlawa. Sa ing-ani nga paagi, updated ang mga estudyante sa mga panghitabo.

Kausa, ang balita nga among gihisgotan mahitungod sa usa ka drug raid nga miresulta sa pagkasikop sa usa ka pusher. Amo dayong gi- dissect ang balita – among gihiwa-hiwa, gitabas-tabas, gitagod-tagod aron mahibaw-an ang lainlaing parte niini.

Ug sa among diskusyon may miingon, “Gwapo ra ba kaayo ang suspect sir, sayang kaayo siya.” May mibagting dayon sa akong ulo. Wala nako palabya ang higayon.

“Kadiyot sa, unsa to imong gisulti?” akong gipangutana ang estudyante. Mitubag siya, “Gwapo kaayo ang suspect sir, sayang kaayo siya.” Miingon ko, “Meaning, kon bati pa tog nawong, mirisi?” Nangatawa ang klase.

Apan wa ko ningkatawa. Mihilom ko, daw naguol, ug mipadayon, “Ana gyod mo, daogdaogon lang mi ninyong mga batig nawong.” Nangatawag samot ang mga estudyante.

“Sige lang sir, kay sa tanang batig nawong ikaw man pud ang kinagwapohan,” ingon pas usa ka bugoy sa luyo, Nag-riot na gyod og kinatawa ang klase.

Bitaw, seryoso ta, miingon ko. Ngano nga kon gwapo o gwapa ang tawo humok man kaayo atong buot niya? Pananglitan, kon naay gwapo o gwapa nga sigeg tutok nimo kiligon ka, apan kon bati ganig nawong ang sigeg tan-aw eeew kaluod sa amaw.

Kon gwapo cute, kon batig nawong pervert? Kon gwapo inosente, kon batig nawong

guilty? Gwapoha nimo oy, nganong nagpari man ka? Malditaha bayhana, mora ra bag gwapa.

Kon gwapo naka-asawag gwapa, nakadaog og sweepstakes. Kon gwapa naka-bana og batig nawong, nasunogan.

Nganong luoy man pirmi ang mga batig nawong? Bati nag nawong, gidaog-daog pa. Matod pa sa kanta ni Yoyoy Villame nga “Kinabuhing Batig Nawong:” Mao kining kinabuhi natong batig nawong

Pagayam-id yam-iran lang ug biay-biayon

Labi na sa pelikula himuon lag abat

Kay ang script bati man sag nawong ang nagsuwat

Labi na gyud og nindot kaayo kang moawit

Daghang masina og mai-publish ka sa songhits

Pagkadaghang manghilabot ug daghang moinit

Basta mosikat na ganing mga pangit

“Wala sa panit ang pagkagwapo og pagkagwapa sa tawo,” miingon ko. “Beauty is not in the outside, wala na sa panit, it’s in the inside, naa sa kasingkasing, atay, batikon, tungol, tinai…” ug wa ko katiwas sa akong wali kay nangatawa na sab pag-ayo akong mga estudyante.