I’ve grown enough
Sa misunod nga mga adlaw, nahibulong ko kay kalit nga nausab ang gipakitang kinaiya ni Jonar nako. Wa na siya maglikay nako. Kanunay na siyang nagpahiyom nako ug nakigsuod na siya nako. Gani, ning dlawa, sa among paggawas sa eskol anang pagka hapon, iya kong giimbetar sa Goldilocks. Wa ko mobalibad,uy! Ampay gud nako nga ikakuyog ko si Jonar.
Ang gibati kong kahibulong wa ko tagaig pagtagad. Maoy akong gihunahuna ang gibati kong kalipay. Imagine, sa akong paminaw pangulitawhan na gyud ko ni Jonar sa di madugay.
“You know, MayAnn, tinuod gyud diay ang giingon nga ang
love di lang gyud mahibaw-an nga bation sa tawo. Di ba giingon ko man nimo nga di pa ko mosu’od anang gugma-gugma?”
“Oo, Jon. K-Kay ngano man diay?”
Kakulba ug kahinam ang akong gibati. Kakulba kay nahigugma na diay si Jonar. Kahinam kay nagtuo ko nga ako na ang maong girl ug iya na kong pangulitawhan karon.
“Na- in-love na ko, uy, MayAnn.” “K-Kinsang bayhana, Jon?” Misamot kakusog ang pagbutuk-butok sa akong dughan. Sige na, Jon, pangulitawhi na ko. Sultihi ko nga
love ko nimo. Giabibahan ko ang akong kaugalingon.
“Mahibaw-an ra nimo unya, MayAnn.”
Nindot kaayog pinahiyoman si Jonar nga mitan-aw og dugay nako. Nagdako gyud ang akong pagtuo nga ako ang girl nga gipasabot ni Jonar nga iyang gimahal. Sige lang, MayAnn, huwat lang. Mangulitawo lagi si Jonar nimo sa di madugay. Nakig-estorya na sab ko sa akong kaugalingon.
Nagkanta-kanta kong misulod sa among balay dihang nakapauli na ko. Diha sa sala si Ate Renren, nagtan-aw sa paborito niyang teleserye. Nakatan-aw siya nako. “Ah, happy man?” Gikidhatan ko ang akong maguwang. Mitupad kog lingkod niya sa taas nga sopa nga iyang gilingkoran. “Happy gyud, Te.” “Si Jonar ba ang rason?” “Ay, oo, Te, uy.” Nagpahikuko nga midip-ig sa akong maguwang. “Sa di madugay, Te, mauyab na gyud nako siya.”
Gisugid ko kang Ate Renren ang pagpakigsuod na ni Jonar nako. Nakapangawot sa ulo si Ate. Iyang gikuptan ang duha ko kamot.
“Aw, mao man kaha. Di na lang ko mosupak anang imong gibati kang Jonar.”
Nakagakos ko sa akong maguwang tungod sa kalipay. Nakapasalamat ko niya. (SUMPAYAN)