Archdiocese, Solid Earth sa ‘greening’
Nassugdan og pagpatuman sa Archdiocese sa Sugbo ang una niining Eco Park ug Fruit Orchard, usa ka pocket forest program sa komunidad pinaagi sa parokya, didto sa Magsico, San Fernando, Cebu sa pakig-alayon sa Solid Earth Development Corp. (SEDC).
Uban sa Parokya sa San Agustin de Hippo sa maong bukirang barangay, mitimaan og kasabutan ang Archdiocese uban sa SEDC nga mananom og 10-mil ka mga kahoy sulod pito ka ektaryang luna sa kompanya nga giminahan kanhi niini.
Usa sa mga nasangputan atol sa 51st International Eucharistic Congress (IEC) nga gipatuman na karon sa Committee on Environmental Concern (CEC) niini, gihulma ang proyekto nga mapatuman sa tibuok archdiocese uban sa mga makig-alayon niini.
Agi og paghudyat, mga 225 misugod sa pagpananom ni’ng bag-o pa lang og 1,600 ka mga linuyong sulod sa usa ka ektarya nga bahin sa luna sa SEDC duol ra sa simbahan sa San Agustin ubos sa temang “Caring for our Common Home: Calls for a Common Action.”
Nag-una ang Arsobispo sa Sugbo Jose S. Palma, D.D. sa pagpananom uban nila Padre Murphy Sarsonas, pangulo sa IEC-CEC nga mao sab ang kura paroko sa Magsico (San Agustin), ug Atty. Dennis B. Tenefrancia, pangulo sa SEDC.
Sa wala pa mananom, mipahimutang una sa time capsule ang mga nanguna uban nila Arch’t. Socorro B. Atega, luyoluyong pangulo sa IEC-CEC ug direktor sa Cebu Uniting for Sustainable Water (CUSW), ug sa mga technical adviser sa SEDC nga sila si Hiroyuki Sakakibara ug Masahiro Tate.
Mipadala sab og delegasyon ang Foundation of the Philippine Environment (FPE), Metropolitan Cebu Water District (MCWD), Department of Environment and Natural Resources (DENR), San Fernando District sa Department of Education (DepEd) uban sa Magsico Elementary School.
“Usa ka pan, usa ka lawas, usa ka katawhan. Naghiusa ta sa atong mga kasing-kasing ug mga paninguha alang niining proyekto,” mipadayag si Arsobispo Palma sa iyang makapadasig nga mensahe bahin sa ilang gipasiugda.
“Alang kini nato nga, ilabi na alang sa mga kabataan ugma, hinuklugan ang kaugmaon. Hinimdoman nato ni’ng adlawa (nga) nagkatapok ta isip usa ka komunidad nga usa ang gilantaw,’ siya midugang.
“Kining nindot nga kalibutan nga gihatag ni Lord atong pasalamatan, atong ampingan, ug atong buhatong mas nindot pa,” siya midugang.
Ubos sa kasabotan, hiniusang bantayan sa SEDC ug sa parokya ang mga natanom nga mga kahoy harun maseguro ang ilang pagtubo nga dili matugaw ug kanunay himsug sa mosunod nga lima ka tuig, ug ilisan pa ang mga mangamatay.
Abagan sab niini ang SEDC sa pagbantay ug pagpadako sa mga kahoy, ug sa pagtaho sa archdiocese matag kwarto.