GULLAS ‘NAHUBOG’ SA FIGHTER WINE
Gipakita ni kanhi PBA star Roger Yap ang iyang igong kasinatian human niya ituboy ang Fighter Wine ngadto sa makutas apan makapaikbi sa atay nga kadaugan, 108-107, batok sa defending
champion Samsam Gullas team niadtong Martes sa gabii sa 10th Emil’s Fresh Chicken Fiesta Cup sa Minglanilla Sports Complex.
Naglabaw ang Gullas team, 107-106, sa katapusang 12 segundos nga maoy nakapaaghat ni Fighter Wine coach Reggie Licanda aron pagdibuho sa sunod nilang play.
Sa paghibalik sa aksyon, si Yap kinsa maoy nakadawat sa bola sa wala nga bahin sa ilang korte, wala’y langan nga milusot bisan pa man sa duot nga depensa sa Gullas Team aron pagsakmit sa labaw, tres segundos ang nahabilin. Human sa timeout ni acting
coach Ronald Bucao, mihugyaw ang mga dumadapig sa Gullas Team human libring nakadawat sa bola si ex-pro Dennis Daa sa ilawom nga bahin, apan kahilum maoy mibanos sa dihang nasipyat kini sa iyang inusarang itsa nga natukma usab sa pagpakupupos sa oras.
Si Joseph Nalos, D-League mainstay, ug ang mga beteranong sila si Jayford Rodriguez ug Danny Aying nagkumboya og 77 puntos alang sa Fighter Wine kinsa mitapos sa elims nga may 3-2 nga baraha alang sa ikaduhang luna sa Bracket B.
Ang Gullas Team nahagsa sa 2-2 nga baraha sama sa San Remegio sa Bracket A. Kagabii ang duha nag-abot kon kinsa ang mosakmit sa no. 1 nga luna.
Way kalahian ang nahitabo sa ikaduhang duwa diin gipatapsingan usab sa SG-ARQ Builders ang San Remegio Propertiers, 93-92.
Sa pipila na lang ka gutling nahabilin sa duwas, naglabaw ang San Remegio, 92-91, apan wa kapugngi nga lusot ni Jojo Tangkay maoy naghatag sa Builders og labaw, siyete segundos ang nahabilin.
Apan sa paghibalik sa bola ngadto sa San Remegio, wa makakontrolar sa bola si Ralph Olivares.
Hinuon didto ra usab kini mopadulong sa kauban nga si Alwin Aguirre kinsa libre ug dali nga nakaitsa sa haduol nga bahin.
Wa mopabor ang kagabhion sa San Remegio tungod kay igo rang miigo sa tumoy sa ring ang bola dayong kapupos sa oras.
Ang cross-over semifinals ipahigayon karong gabii, diin ang SG nga maoy no.1 sa Bracket B maghuwat kon kinsa ang mapildi tali sa Gullas Team ug sa San Remegio nga giduwa kagabii.
Ang modaog niini mao usab ang makigsangka sa Fighter Wine sa laing semifinals match. First Game Fighter Wine (108) – Nalos 28, Rodriguez 27, Aying 22, Roger Yap 8, Tamala 8, Ron Yap 4, Garcia 3, Manugas 3, Avila 3, Galinato 2. Samsam (107) – C anson 25, Dennis Daa 24, Delator 19, Collado 13, Poligrates 7, Dela Cerna 6, Sanz 6, Cantonao 5, Aguilar 2 Second Game: SG-ARQ (93) – Calo 22, Juntilla 14, Lusdoc 11, Mondrago 8, Tangkay 7, Abad 5, Cainglet 5, Abadia 4, Berame 6, Ababon 4, Belande 4 San Remegio (92) – Desiderio 22, Olivarez 13, Arong 13, Lao 9, Regalado 9, Cortes 6, Taboada 4, Auditor 4, Graf 3, Cincoflores 2, Aguirre 2.