Tribu Lapu-Lapu apil sa Ironman
Ang kagamhanan sa dakbayan sa Lapu-Lapu adunay 19 ka mga atleta nga mosalmot sa Ironman 70.3 nga ipahigayon karong Domingo nga magsilbing ikatulo nilang pagsalmot sa maong international triathlon.
Sugdan sa 4:00 sa kadlawon ngadto na sa 4:00 sa hapon ang pagsira niadtong kalsada nga subayon sa mga atleta atol sa run ug bike events.
Suportado ni Mayor Paz Radaza ang Tribu Lapu-Lapu nga mosangka sa relay female ug male category, relay mixed, individual ingon man duha ka representante alang sa Ironkids nga magsul-ob sa branding colors uniforms.
“Our athletes are expert of their own field,” tipik sa pamahayag ni Nicole Frances Balao, non-playing team captain sa Tribu Lapu-Lapu.
Samtang ang mga motorista gipahibawo sa mga kalsada nga sirhan sa Agosto 6, (Domingo) nga sugdan sa 4:00 sa kadlawon ngadto na sa 4:00 ilabi na niadtong lane nga nanukad sa Mactan Newtown subay sa M.L. Quezon Highway saka na sa Marcelo Fernan brigde samtang ang pikas lane bukas alang sa mga motorista.
Lakip nga sirhan sa maong oras ang dalan gikan sa Mactan Newtown ngadto na Shangri-La Mactan Resort and Spa ngadto na sa Punta Engaño alang sa run leg, apektado sab ang mga intersection sa naasoyng kalsada.
Gibana-bana nga dul-an sa 1,200 ka mga PNP personnel wala pay labot sa Philippine Air Force, Navy, Coast Guard ug Maritime ang ipakatap alang sa prestihiyusong kompetisyon.