Blackwater Elite nipadayag og interes kang Pringle

Sa nabulgar nga komosyon sa kampo sa GlobalPort Batang Pier, usa ka team sa Philippine Basketball Association (PBA) ang interesadong masayod kon asa paingon kining maong senaryo.

Niadtong Dominggo atol sa duwa sa Batang Pier batok sa Brgy. Ginebra Gin Kings, nasaksihan sa mga tumatan-aw ang grabeng panaglalis nila ni Batang Pier coach Franz Pumaren ug sa usa sa mga sinaligan sa team nga si Stanley Pringle.

Naglamano ra hinuon ang duha pagsugod sa 3rd quarter apan nasayran sa tinubdan sa Spin.Ph nga miulbo ang kalagot ni Pringle sulod sa dugout sa halftime break.

Gipakalma sab ni Pumaren ang tensyon pinaagi sa pagsulti sa mga reporter nga dili ra kini angayang hatagan og dakong pagtagad.

Apan lahi ang naa sa hunahuna sa tag-iya sa Blackwater Elite nga si Dioceldo Sy, kinsa dayag nga miangkon nga dugay ra siyang interesado nga mokuha kang Pringle.

Gipasabot ni Sy nga andam siyang makignegusasyon sa GlobalPort kabahin niini.

Matod ni Sy nga andam nilang ibaylo ang ilang 1st round pick sa umaabot nga rookie draft alang kanbg Pringle, kinsa maoy No.1 overall pick niadtong 2014 ug Rookie of the Year awardee.

“We’re willing to trade our first-round pick in the coming draft for Pringle,” dugang ni Sy.

Lakip sa dekalidad nga mga magduduwa nga manugsulod sa PBA karong tuiga mao sila si Kiefer Ravena, Jeron Teng, Bobby Ray Parks, Reymar Jose, ug Fil-German Christian Standhardinger.