Mga dan sirhan atol sa Ironman

Kon duna kay biyahe sa Lapu-Lapu City, mas maayong mosayo ka kay mga karsada sa dakbayan sa Lapu-Lapu, Mandaue, Cebu City ug Talisay pangsirhan alang sa Ironman karong Dominggo.

Sirad-an sa City Traffic Operation Management (CCTO) ang tibuok Serging Osmeña Avenue ug South Coastal Road.

Si Francisco “Isko” Ouano, operations head sa Citom, nagkanayon nga sirad-an sa Citom sugod alas 5 sa buntag hangtod alas 12 sa udto ang gikan sa utlanan sa Mandaue City (Mahiga bridge) paingon sa subway sa Plaza Independencia lahos sa South Road Properties para paghatag og agianan ug seguridad sa libuan ka mga atleta.

Ang habig sa Mandaue sirad-an usab Traffic Enforcement Agency of Mandaue (TEAM).

Kini mao ang tibuok Ouano Avenue, A. Soriano avenue, DM Cortes ug UN avenue nga mopaingon sa Lapu-Lapu.

Sirad-an usab ang habig sa dakbayan sa Talisay sa South Coastal Road sugod alas 4 sa kadlawon hangtod alas 2 sa hapon.

Apan si Ouano nagkanayon nga kon adunay mga emerhensiya, makaagi ra gihapon ang mga emergency vehicle aron pagtubag sa alarma sanglit ang Citom mo-deploy sa ilang 180 ka mga traffic enforcer.

Ang Cebu City Police Office, Mandaue City Police Office ug Talisay City Police Office mopakatap sa ilang mga pulis sa rota sa Ironman.

Ang Lapu-Lapu mopakatap og 1,000 ka mga pulis sanglit adto magtapok ang tanang atleta.

Mga dalan nga maapektuhan sa road closure sa Lapu-Lapu sugod alas 4 sa kaadlawon hangtod alas 4 sa hapon mao ang gikan sa Mactan Newtown paingon sa Manuel L. Quezon highway, paingon sa Marcelo Fernan Bridge, alang sa lumba sa biseklita.

Ang dalan gikan sa Mactan Newtown paingon sa Shangrila ug Punta Engaño sirad-an usab alang sa lumba sa dagan.

Ang mga motorista gikan sa airport adto paagion sa Sangi-Seaweeds-Motumbo.

Sa Cebu City, ang mga sakyanan nga gikan sa norte paagion sa dalan Logarta, liko sa tuo paingon sa dan Cabahug o diretso sa SM City area.

Ang mga sakyanan sa southern Cebu adto paagion sa dalan N. Bacalso ug paingon sa tagsa-tagsa ka destinasyon.

Bugtong hangyo ni Ouano nga likayan ang pagsuway og agi sa S. Osmeña ug South Road Properties gikan sa alas 5 sa kadlawon hangtod alas 12 sa udto aron di madugay sa ilang biyahe ug mosunod sa ilang mga karatola aron sila matultolan paingon sa ilang destinasyon.