Duterte milagda sa balaud alang sa libreng tuition fee sa mga SUC

Dugang kabus nga mga tinun-an ang makaeskwela sa kolehiyo human pirmahi ni Presidente Rodrigo Duterte niadtong Huwebes sa gabii ang bag-ong balaod diin libre na ang bayranan sa tuition sa state universities ug colleges (SUCs).

Si Budget Secretary Benjamin Diokno niingon magsugod ang pagpatuman niini sa unang semester sa school year 2018-2019 diin tinuon kon pila ang kinahanglanon nga pundo gikan sa 2018 budget.

Si Gob. Hilario Davide III namahayag nga pinaagi sa bag-ong balaod, mas daghang kabataan ang mahatagan og higayon nga makatungha sa kolehiyo labi na niadtong way ikasarang.

Ang kagamhanan sa lalawigan sa Sugbo dunay scholarship program nga gitawag og Paglaum, diin ang mga eskolar nga sakop niini makadawat og P10,000 alang sa mga bayranan sa tunghaan ug P1,500 isip allowance.

Ang mga benepisaryo niini kinahanglan molupyo sa lalawigan ug moeskwela sa mga unibersidad ug kolehiyo nga gipadagan sa gobiyerno, gawas lang sa mga kurso nga medisina ug abogasiya.

Samtang, dunay laing scholarship program alang sa mga valedictorian ug salutatorian diin ang Kapitolyo ang ning-abaga sa ilang pagtungha ug matag buwan aduna silay allowance nga tag P2,000.

Moabot sa 634 ang Paglaum scholars sa Kapitolyo kasagaran nagtungha sa Cebu Normal University ug Cebu Technological University.

Ubos sa Universal Access to Quality Tertiary Education Act of 2017 nga gipirmahan ni Duterte, ang gobiyerno na ang moabaga sa tuition fees, miscellaneous ug ubang mandatory nga bayranan sa mga tinun-an nga nagtungha sa mga unibersidad, kolehiyo ug technical-vocational institutions nga gipadagan o gidumala sa kagamhanan.

Ang mga economic manager sa presidente unang nipadayag og kabalaka nga maglisod ang gobiyerno pag- subsidize sa tuition sa mga SUC nga gibanabanang moabot og P100 bilyones.

Apan alang ni Davide nga ubos sa Constitution klaro nga gimando nga usa sa mga polisiya sa estado nga hatagan og prayoridad ang edukasyon hinungdan nga dako ang budget alang niini.

“Gani, even ang budget kulangon gihapon. With these free tuition for students sa (SUCs) that will entail a bigger budget. Pero mao man na ang mando sa Constitution,” pahayag ni Davide dungan sa pag-ingon nga makatabang kini paghaw-as sa mga tinunan gikan sa kalisod.

Duna gihapoy scholarship grants ug student loan program alang sa mga tinun-an sa publiko ug pribadong mga tunghaan sa kolehiyo.

Ang balaudnon nga gipasar sa Kongreso niadtong Mayo, naabot sa Office of the President niadtong Hulyo 5 alang sa pagpirma ni Duterte.