Ayaw’g dugang sa igang

Sa kapaspas pagdagan sa panahon karon para maapas ang inadlawnga gastuhanan ug palaliton, usahay di na magka-abot ang kabanay para magkakukabildo. Gani inig abot ni tatay o ni nanay inig kagabii, tulog na ang mga bata.

Usahay ang ka kuwang sa oras maoy rason nganong mawagtang ang pagsinabtanay kay mag-iyahay naman lang ang kabanay og himo sa ilang isig ka tulumanon. Ang kadaot kay kung magdugay kini nga sistima, ma-uli kini sa way pagsinabtanay dayon away.

Aron dili madugangan ang igang, diay akong mga kinuykuyan nga mga sugyot para magpabiling lig-on ang relasyon ug tunhay ang pagpadagan sa banay:

Undanga ang pagkomparar nimo ug sa imong kabanay ngadto sa uban kay bisag unsaon, duna gyuy molabaw og dunay moubos. Way kalaki ang pagtandi kay kini makainsecure ug makapamubo sa pagtan-aw sa kaugalingon.

Biya-i na sab ang pagmahay sa mga nangaging hitabo labi na niadtong mga sakit o bati nga kasinatian nga naka buslot sa imong bulsa, nakapagutom, nakapasamad sa kasing-kasing o nakapasakit sa ulo. Tago-i ug gamita hinuon ang mga leksyon ang imong nakuha ini para ikaw makabalik og barog ug padayong makalakaw.

Ayaw na og segi’g kasuko kay alkansi ka. Sa imong lawas mabalik ang imong mga kalagot ug bating binuhatan. Ang mahitabo, ikaw ang masakit. Mas maayo pang kiputon ang baba og mo palayo una sa makadiyot aron makaginhawa og lawom ug makahuna-huna og insakto kaysa makabuhi og bastos nga mga pulong ug buhat nga makapasakit hinuon sa uban.

Matod pa sa akong inahan “Life is short. Die today, die tomorrow, the same die!” maong angay higugmaon ang kaugalingon og una. Kaon sa imong paboritong pagkaon, paputol sa buhok, manicure,

pedicure o pagwapa, basa sa imong paboritong basahon, og suroy sa lugar nga imong gihandom ug gustong tultulon.

Sa katapusan, palayo sa mga tsismosa, libakira, hilabtanon ug kusog nga manghusgang higala kay kini sila mao ray mobira nimo paubos. Unayon ka lang pagdunggab sa mga tamay ug saway sa imong pagtalikod.