Patas nga regulasyon
Hangtod karon wa pa gyuy tinong kasabutan nga nakab-ot ang Land Transportation Franchise and Regulatory Board (LTFRB) ug ang transport network companies (TNC) nga mao ang Grab Philippines ug Uber. Pero sa mga nangagi nilang panagtagbo daw sa nabutang sa apiki ang sitwasyon sa Uber ug sa Grab kay bisan unsaon nila og panalipod sa ilang gihimo molutaw man nga nakasupak sila sa balaod ug usa ka ilegal ang ilang gibuhat.
Niadtong Agosto 3, sila mipadayag atubangan sa mga magbabalaod sa ilang kaandam na nga mokuha og mga franchises gikan sa gobiyerno aron maoy magamit sa ilang drivers.
Ang Grab uyon nga ang franchise maoy rekisitos ug ingon man sa ilang mga partner nga driver.
Ang Uber, sa ilang bahin, misugyot usab nga ang franchise requirement angay lang ngadto sa mga drivers tungod kay ang ilang kompaniya dili man mao gyuy aktuwal nga moserbisyo sa publiko.
“We are not adverse to regulations. The only thing we are asking for is the right regulations, right processes that look after the best interest of the riding public,” matod ni Leo Gonzales, public relations sa Uber.
Tinuod kining gipadayag ni Gonzales nga hatagan sab og gibug-aton o importansiya ang interest o ang ka komportable sa riding public, pero wa kini magpasabot nga ato na lang ikompormiso ang balaod aron matuman ang ilang kagustohan bisan tuod og dunay mayatakan.
Pananglitan, nag-antos ang mga taxi operators sa kamahal sa pagpamalit og mga sakyanan ingon man sa pagbayad sa prankisa aron lang makapamasahero, apan ania hinuoy Uber ug Grab nga wa gani kaugalingong unit apan yano lang mopadagan og mga awto aron usab makapamasahero. Asa na man ang kaangayan niana? Nganong lisod man sab alang sa Grab ug Uber ang pagtuman ug sunod sa mga balaod nga gilatid ubos sa LTFRB?