SG-ARQ vs. San Remegio sa Emil's Cup finals

Tagsatagsang gipanglupig sa comebacking San Remegio Properties ug sa wa pay pilding SG-ARQ Builders ang ilang mga kaatbang sa cross-over semifinals round aron pag-angkon og luna sa 10th Emil’s Fresh Chicken Fiesta Cup finals sa Minglanilla Sports Complex, lungsod sa Minglanilla.

Ang San Remegio ni coach Randy Colonia nga misandig sa unom ka mga players nga mitali og double figures, mibuntog sa Fighter Wine, 94-84, samtang ang Builders ni coach Marvin Caro pormal nga mipalagpot sa two-time defending champion Samsam Gullas, 95-85.

Ang Fighter Wine miduwa nga wala ang ilang sinaligan nga si kanhi PBA star Roger Yap kinsa napugos sa paglarga sa Kaulohan tungod sa kamatayon sa iyang maguwang nga si Reyrey Yap. Naatol ang kamatayon ni Reyrey sa adlawng natawhan ni Roger.

Diha man tuoy mga higayon nga sikit nga nakigkombati ang Fighter Wine apan wa kini makasugakod ilabi na sa pagpangiko sa mga shooters sa San Remegio nga si la si Harold Cincoflores, James Regalado ug Ralp Olivares.

Si Cincoflores maoy nangulo pinaagi sa iyang 18 puntos, 16 usab ang nahimo ni Desiderio ug 14 ang kang Regalado.

Ang laing nakamugna og double figure nga puntos mao sila si Dimco ug Adrian Lao nga may 11 ug 10 puntos.

Samtang ang SG-ARQ nga gibituonan sa mga beterano ug mga ex-PBA players mipakita usab sa ilang saktong dominasyon sa naghinapos nga bahin.

Nagpulipuli pa og sakmit sa labaw ang duha ka habig sulod sa kapin tulo ka quarters apan sa katapusang singko minutos sa duwa, sila si Eman Calo, Jojo Tangkay, Reed Juntilla ug Ferdinand Lusdoc ang naghugpong aron pagsiguro sa kadaogan.

Katapusang nakalabaw ang Gullas team sa nahabiling sais minutos pinaagi sa duha ka free throws ni Joe Camson apan gikan niadtong wala na kini makapugong sa nag-asoaso nga opensa sa Builders.

Mga puntos: First game:

San Remegio (94) – Cincoflores 18, Desiderio 16, Regalado 14, Olivares 13, Dimco 11, Lao 10, Aguirre 4, Aron 2, Taboada 2, Taboada 2, Sumayang 2, Auditor 2. Fighter Wine (84) – Rodriguez 24, Brigondo 20, Nalos 16, Aying 13, Galinato 4, Avila 3, Abapo 2, Garcia 2. Second game:

SG-ARQ (95) – Lusdoc 29, Calo 21 (5 triples), Juntilla 14, Tangkay 8, Abad 7, Ababon 6, Mondragon 5, Berame 4, Abadia 1.

Samsam (85) – Collado 15, Canson 12, Poligrates 11, Dennis Daa 10, Sanz 8, Villaceran 8, Dela Cerna 6, Tarosa 5, Gahi 4, Aguilar 4, Delator 2.