CESAFI '17 SUGDAN NA

Mga duwa karon 1:00 pm- Opening 4:00 pm- SWU batok UC ( jrs) 5:30 pm- SWU batok UC (srs) Sama sa naandan, gilaumang mosugwak ang mga tawo sulod sa Cebu Coliseum karong hapon sa pagsugod sa 2017 Cebu Schools Athletic Foundation Inc. (CESAFI) basketball event.

Ang opening program ipahigayon sugod sa ala 1:00 ang takna sa hapon. Modayandayan sa programa mao ang pagpili sa Miss Cesafi ‘17 alang sa high school ug college divisions.

Human sa programa mao ang aktuwal nga kompetisyon diin magsangka ang high school ug college squads sa SWU ug University of Cebu (UC).

Unang magsangka ang SWU Baby Cobras batok UC Baby Webmasters alang sa high school division samtang magabot sa main game ang Cobras batok Webmasters alang sa college category.

Ning maong mga panagparang, ang engkuwentro sa college division mao ang labing giatangan gumikan sa drama nga naglambigit niini.

Ang kanhi coach sa Cobras nga si Raul “Yayoy” Alcoseba mao na karon ang mogiya sa Webmasters.

Si Alcoseba, kinsa usa ka multi-titled coach sa Sugbo, makigparang sa iyang kanhi assistant nga si Mike Reyes, kinsa mao na karon ang modala sa Cobras.

Sukad pa kaniadto, ang Webmasters supak sa ideya nga magbutang og import sa ilang puwersa apan nausab kining tanan sa pag-abot ni Alcoseba, kinsa naila nga dili bastabasta magpalupig.

Sa tinguha nga makaparang sa lig-ong teams sa liga, si Alcoseba mikuha kang 6’7” Cameroonian Frederick Elombi isip import aron makatabang sa ilang kampanya.

Si Elombi makigtambayayong sa mga beteranong sila si Justine Dacalos ug Puerto Garciano sa pagpangulo sa Webmasters.

Ang Webmasters maoy usa sa tulo lang ka teams nga adunay import ning tuiga. Ang laing duha mao ang defending champion SWU Cobras ug USPF Panthers.