NAGKALISOD NGA TAHAS
Nakalusot man tuod ang Gilas Pilipinas sa babag sa defending champion China sa group stage sa FIBA Asia Cup sa Lebanon apan aduna pa’y tulo ka lig-ong mga kontra nga ilang kinahanglang masagubang paingon sa labing una niining Asian title gikan niadtong 1986.
Ang kadaugan sa Gilas batok sa China, 96-87, ug Iraq, 84-68, igo na aron maseguro niini ang No.1 spot sa Group B alang sa quarter-finals sa kompetisyon, nga gikombatihan sa 16 ka mga nasod.
Sa presstime, ang Gilas padayon pang nakigsangka sa Qatar kagabii sa katapusan niining tahas sa group stage apan wala na kini balor alang sa mga Pinoy.
Sa quarter-finals, ang Gilas posibling makigharong sa host Lebanon o South Korea. Gilauman nga masugakod ra sa Gilas ang tahas sa quarter-finals bisan kinsa ang makontra niini apan sa semi- final s paingon na sa finals mao ang labing lisod nga misyon sa mga Pinoy.
Nag- atang sa agianan sa Gilas paingon sa titulo mao ang Australia, Iran ug New Zealand. Ang Australia, nga mingsalmot sa FIBA Asia sa labing unang higayon, adunay ligong puwersa bisan wala ang ilang mga magduduwa gikan sa National Basketball Association (NBA) nga sila si Andrew Bogut, Ben Simmons, ug Patty Mills. Ang Australia yanong ning- lampornas sa nag-una nilang duha ka mga kontra nga mao ang Japan, 84-68, ug Hong Kong, 99-58, sa Group D.
Adunay mga nakapangutana kon nganong ningsalmot ang Australia sa FIBA Asia nga unta taas ra man ang ilang kalibre kumpara sa ubang teams sa Asya. Ang Iran, nga nabuntog sa Gilas niadtong 2013 sa Manila, kalit lang nahimong usa sa labing gikahadlukang puwersa human nakadesisyon ang ilang higante nga si NBA veteran Hamed Haddadi nga moduwa.
Ang 7’2” wala nakaapil sa kinatibuk-ang preparasyon sa Iran alang sa FIBA gumikan kay nagpaalim kini sa iyang angol.
Gipanglampornas sab sa Iran ang nag-una nilang duha ka mga kontra nga mao ang India, 101-54, ug Syria, 87-63, sa Group A.
Ang New Zealand aduna ra’y tulo ka daan nga mga magduduwa apan ang ilang mga bag-o pulos adunay igong kapabilidad.
Gipangkastigo sa New Zealand ang Kazakhstan, 70-49, sa premiro nilang tahas sa Group C unya gisundan kini nila og makutas nga kadaugan batok sa host Lebanon, 86-82.