Well, that was just a lie
Gawas sa Busay, sa laing lugar nga nindot suroyan sa Cebu mi mag- joy riding si Jimbo. Enjoy gyud ko, uy. Apan sa nadugay na, inanay nga nawala ang gana ko kang Jimbo. Hangtod nga wa na ko magmalipayon sa among panagkuyog. Dinhi, nasuta ko nga di diay love ang gibati ko kang Jimbo. Usa lang diay ka pag- admire sa iyang kaguwapo ang gibati ko niya.
Aw, unsa pay dugayan? Nakigbuwag ko kang Jimbo.
“Di man sab angay pugson nato ang atong kaugalingon, Susette. Kon inamigo lang ang imong feeling nako, it’better nga magbuwag ta.”
“Salamat, Jim, nga nakasabot ka.”
Human kang Jimbo, gikaila ko si Grego. Di siya matawag nga guwapo gyud apan tungod sa pagka mapahiyumon niya, nadani ko niya.
“Bitaw, Susette. Nakagusto ko nimo.”
Kon tan-awon gyud pag-ayo, seryuso si Grego sa iyang pagpangulitawo nako. Nabatyagan ko sab nga nakagusto ko niya. Gisugot ko siya. Apan parehas sa gibati ko kang Jimbo, wa magdugay ang maong pagbati ko kang Grego. Dali rang nawala ang gituhoan kong love nga akong gibati niya.
Nakigbuwag ko kang Grego. Maayo gani kay misabot sab siya ug wa siya masuko nako. Parehas sila si Jimbo, sports lang kon bahin na sa relationship.
Nahibulong ko sa akong kaugalingon kon nganong dali ra mawala ang bation kong gugma ngadto sa akong gikarelasyong lalaki. Unya may misantop sa akong hunahuna. Nahikatawa ko. “Simbako uroy, no? Di ko
lesbian, uy!” Nakaingon ko sa akong kaugalingon. Bitaw, seguardo gyud kong di ko tomboy. Wa lang gyud tingali matukma ang akong gibati ngadto sa gitawag nga true love. Nakapanglingo na lang ko. Nakadesisyon ko nga di na ko makigrelasyon og opposite sex. Nag- concentrate na lang ko sa akong pag-eskuwela.
Nanglabay ang mga adlaw, nahuman ang first semester. Mibakasyon ko sa among resthouse. Nagpa- enroll ko daan para sa next semester. Kon hapon, maglingkod ko sa baybayon ubos sa among resthouse. Mag-atubang ko sa lawod. Malingaw ko nga magtan-aw sa mga mananagat nga nagbaruto. Sa mga namasol nga nagtungtong sa dakong bato. Sa mga namukot.
Unya nakalingi ko sa usa ka lalaki nga naglakaw paingon nako. Nagwara-wara siya sa iyang kamot nako. Si Jude!
(SUMPAYAN)