Suporta sa amahan
Dear Atty. Joan,
Ako si Ruby, usa ka inahan nga adunay 10 anyos nga anak. Dili kami kasado sa iyang amahan apan pirmado niya ang birth certificate sa among bata ug gi- recognize niya kini sukad sa iyang pagkatawo. Minyo na ang amahan karon ug aduna nay laing pamilya. Pwede ba ko makapangayo niya og tabang pinansyal para sa among anak, Atty?
Ruby
Dear Ruby,
Oo, mamahimo kaayo nimo siyang pangayo-an ug tabang pinansyal para sa inyong anak, o giingon ta nga “com- mon child”.
Sulod sa atong balaod, ang mga ginikanan adunay obligasyon nga musuporta sa ilang mga anak ug kining suporta mamahimong pinaagi sa pinansyal nga tabang alang sa pang-adlaw-adlaw nga panginahanglanon sama sa pagkaon, pangbayad sa tuition o sa gamit sa tunghaan, pamilete, panginahanglanong medical ug uban pa nga gikinahanglan sa paglambo sa bata.
Tinuod gihapon kini bisan pa ug ang ginikanan sa bata dili kasado. Ang obligasyon sa ginikanan sa pagsuporta sa anak nagtubod sa relasyon o kining atong giingon nga “paternity”. Mao nga dili pud babag sa pagpangayo ug suporta gikan sa pursusong amahan ang pagkaminyo niini ngadto sa lain. Ang di makatarunganon nga paghikaw og suporta ug tabang pinansyal kay posible nga kalapasan sa RA 7610 (Anti-Child Abuse Law) ug sa RA 9262 (Anti-Violence Against Women and Their Children Law).
Atty Joan
Alang sa mga pangutana bahin sa mga katungod sa mga bata, ilabi na sa pagproteher kanila, ug kon dunay namatikdan nga gidili nga binuhatan o matang sa pang-abuso sa mga bata, kontak dayon sa hotline sa 0908-896-0355.