Paghakot sa basura hinay: Garganera
Gisaway ni Cebu City Councilor Joel Garganera ang kahinay paghakot sa Pasajero Motors Corp. (Pamocor) sa mga basura gikan sa transfer station paingon sa landfill sa lungsod sa Consolacion.
Sa record nga gihuptan sa konsehal, ang serbisyo sa Pamocor nisobra lang gamay sa katunga sa kaepektibo sa serbisyo sa Jomara Konstruckt Corp. ( JKCO) nga maoy kanhi service provider sa City Government.
Matod ni Garganera, kinsa kanhi chairman sa committee on environment sa konseho, nga nag- average og 505.71 ka tonelada matag adlaw ang JKCO samtang 297.41 tonelada nga basura ang habig sa Pamocor.
Si Roberto Cabarrubias, pangulo sa Department of Public Services (DPS), nipasalig nga mahakot sa service provider ang basura sa transfer station sa higayon nga aduna nay makakuha sa P124 milyones nga kontrata hangtod sa Nobyembre, kansang bidding ilang ipahigayon sa mosunod nga mga semana.
Wa usab makauyon ang konsehal sa paagi sa kontrata sa Pamocor sanglit ang service provider iyang gihulagway nga nagsalig lang sa sub-contract, way kontrol sa mga drayber, ang heavy equipment nga iya sa sub-contractor, di 24/7 ang operasyon.
Samtang, ang JKCO, matod ni Garganera, adunay kaugalingon nga 10-wheeler dump trucks, kontrol sa ilang kaugalingon nga drayber, adunay duha ka backhoe ug usa ka bulldozer.
Moabot usab og 24/7 ang operasyon, adunay reserba nga truck kon magub-an, adunay kaugalingon nga fuel tanker samtang ang drayber adunay tulo ka trips nga quota kada adlaw.
Giingon sa Pamocor nga aduna silay 70 ngadto sa 100 ka mga dumptrucks, apan matod ni Garganera, ang mohakot sa basura aduna lay kapin sa 20 ka 10 wheeler truck.
Gipasabot niya nga kon ang performance sa Pamocor maoy basehan, di sila angay makadaog sa bidding ug ma- disqualify atol sa post qualification sanglit di sila makahakot sa gidaghanon sa basura sa Cebu City matag-adlaw diin gibanabana sa DPS nga 600 tons matag adlaw.
Samtang dugang ni Garganera nga adunay mga basura nga niadto pang Mayo gilabay sa transfer station sa Inayawan nga hangtod karon wala pa mahakot sa Pamocor sanglit ang mga bag-ong basura ang ilang unahon.