Lola, 100, nakadawat og P100,000
SI Lola Dionisia Pahugot maoy labing unang Senior Citizen sa dakbayan sa Lapu-Lapu nga nakadawat og P100,000 gikan sa LapuLapu City government dihang naatol nga na-aprobahan na ang resolution sa konseho sa dakbayan.
Niadtong Hulyo 25, 2017 giaprobraban ang resolution nga maghatag og “Centenary Senior Citizens Award” ngadto sa kwalipikado nga Senior Citizens sa Lapu-Lapu.
Sa kadtong mga tiguwang nga makaabot sa ilang ika100 nga birthday gawas sa pagkaon nga ihatag gikan sa buhatan ni Mayor Paz Radaza alang sa salo-salo cash gift nga P100,000 ug trophy o plaque ang ilang madawat.
“Centenarians are considered role models and are worthy of emulation and public recognition as an inspiration to aspire for a long span of life by adapting a healthy lifestyle,” tipik sa natala sa resolution.
Kagahapong adlawa personal nga gitunol ni Radaza inubanan ni Bise Mayor Marcial Ycong ang tseke ngadto ni Lola Isyat nga nagsaulog sa iyang ika- 100th birthday nga natawo niadtong Agosto 16, 1917.
Si Pahugot nga taga Sityo Timpolok, Barangay Gun-ob ang adunay unom ka mga anak kapin sa 30 ka mga apo ug 20 ka mga apo sa tuhod ang nahibung sa pagdagsa sa mga tawo didto sa ilang pinuy-anan.
“Ikaw maoy mayor?,” hunghong ni Pahugot ngadto ni Radaza nga diha sa iyang tapad kay mao pa kadto ang unang higayon nga iyang nakita ang opisyal.
Kanhi kusinera si Lola Isyat sa dihang bata-bata pa ug nadungog sa ilang dapit nga lami moluto og humba, apan bisan pa man di siya hingaon og karneng baboy gawas lang sa sari-sari nga utanon nga subakan og bolinao.