Mipauli ang vigilante
Hinay ang baswat sa mga lakang ni Ignacio nga mipaingon sa ilawom sa punoan sa dakong kahoy nga akasya. Dugay na kining kahoya dinhi ug matod pa sa iyang apuhan nga si anhing Lolo Julio, panahon pa sa mga Katsila diha na kining kahoya. Miginhawag halawom si Ignacio ug iyang gihiram ang puan sa iyang pistola nga kalibre .45. Kining maong pistola iyang nakuha didto sa karaang kaban sa iyang apuhan. Usa ka sundalo kadto si Lolo Julio ug sharp shooter. Pinangga siya sa iyang Lolo ug gitun-an siya pagpunting ginamit ang pistola sa ilang ensayo. Dali ra siyang nakat-on, Sa katapusan nilang ensayo naigo niya ang dose ka buok lata nga gipangpatong sa mga gagmayng kahoy-kahoy dinhi sa bungtod.
“May abilidad ka, Ignas. Naigo mo ang tanang mga lata. Hingigo ka, ug magamit mo ra kini sa umaabot nga mga adlaw. Pero hinumdomi nga dili maayo sa usa ka tawo nga magpakabuhi sa armas, kay giingon man sa Bibliya nga ‘ang magpakabuhi sa espada, mamatay usab sa espada’,” matod ni Lolo Julio kaniya. Wala gyud malimot si Ignacio niini.
Human sa pagpanglabay sa mga adlaw, bulan ug katuigan, nakab-ot niya ang gipangandoy niya nga propesyon nga mao ang pagka pulis. Sa iyang kabatan-on nahimo siyang sakop sa kapulisan sa siyudad. Daghan nang mga krimen ang iyang nasumpo.
Ug karon dinhi ning ilang lungsod migrabe ang krimen. Dunay mga tulis, lugos sa mga batan-ong babaye, kawat sa mga binuhing hayupan, engkuwentro sa mga ‘gang’ ug labaw sa tanan, ang pagpayuhot sa mga ginadiling drugas sama sa shabu, marijuana ug uban pa. Nangahadlok na ang mga lumolupyo dinhi sa ilang lungsod, lakip na ang kabaryuhan sa bukid ug sa patag.
“Grabe na kining atong lungsod, Ignas. Wala na ganiy magtikawtikaw dinhi sa sayong mga gabii kay nahadlok sa mga krimina.. Si Insek Monga gitulis ug gilugos ang iyang anak dalaga. Si Rosalina gilugos ug gitambog sa sapa ang iyang patayng lawas. Sila si Mitoy, Edong, Makoy ug Dado, ‘tua na’, kay gipusil sa wala hiilhing mamumuno nga nagsakay og motorsiklo,” asoy ni nanay niya Petyang.
Kahilakon si Ignacio kay si Dado ig-agaw niya igtagsa. Apan ang labing sakit alang kaniya mao ang nahitabo kang Rosalina, ang dalaga nga hilom niyang gihigugma ug daygan na unta niya sa iyang pagbati ning iyang pagpauli.
“Mao bitaw nga mipauli ko dinhi sa ato, Nay,” ni Ignacio sa kalma nga tingog. “Aron mahibawo ko sa tanang panghitabo dinhi. Unsaon nga didto man ko madestino sa siyudad!”
UNYA matag gabii dunay grupo sa mga dautang tawo sa ilang lungsod nga gi-masaker. Ug didto sa sityo Lungag-Omang gilabay og granada ang ‘gang’ ni Credo, ang gidungog nga lider sa mga tulisan. May gipatay nga tigpayuhot og shabu. Morag halos tanang mga maldito ug badlungon sa lungsod gianam-anam og panghipos. Nabaniog nga hingigo kaayo ang vigilante kay sa mga agtang gayud sa kriminal motama ang bala.
Usa niana ka hapon miadto si Ignacio sa tindahan nilang Jose-Nelia. Diha si Banong, bata-bata sa giilang ‘Godfather’ sa ilang lungsod, kuyog sa duha ka kauban. Duna siyay pagdumot kang Banong kay gitamparos siya niini sa dili pa siya pulis.
Nakasabot si Banong nga silay tuyo ni Ignacio. Mingbunot sila sa ilang mga armas, apan abtik si Ignacio nga nahauna paghulbot sa iyang pistola kalibre.45. Gipusil niya sa mga agtang si Banong ug ang duha ka kauban niini.
Nianang pagka Sabado nabalita sab nga patay na si Osmundo, ang giilang ‘Godfather’ sa mga kriminal sa lungsod. Milusot sa iyang agtang ang bala sa usa ka armas de fuego nga kalibre.45. Sa kamatayon ni Osmundo nahibalik ang kalinaw sa lungsod nilang Ignacio. (KATAPUSAN)