Tagdumala sa Rico's Lechon mipasabot sa rason nganong gipasirad-an
Duha ka semana human nasirad-an ang duha ka sanga sa Rico's Lechon sa dakbayan sa Sugbo, nipatim-aw ang CEO ug founder niini nga si Enrico “Rico” Dionson sa rason nganong naabot sa pagkasira sa ilang sikat nga kan-anan.
Gibutyag ni Dionson nga partner diay sila sa daughterinlaw ni Cebu City Mayor Tomas Osmeña nga si Bea Villegas kinsa asawa sa iyang anak nga si Miguel. Ang General Manager for
restaurant nga si Melanie Grace Oyas nipasabot nga sukad 2012 hangtod kaong tuiga, aduna'y “Authority To Use The Name” sa Rico's Lechon ang Dionson and Villegas Corporation diin 30 porsyento ang share ni Bea niini.
Dugang niini nga karong Hulyo 31, ang expiration sa maong lima ka tuig nga kontrata ug Hunyo ning tuiga dihang nipadayag ang pamilyang Dionson nga sila una ang modala sa ilang restaurant ug dili na mo- renew sa katungod nga mogamit sa pangan.
Giingon nga dihang ilang gisultihan si Bea niini, niingon kini nga konsultahon iyang bana nga si Miguel apan pipila ka semana human sa ilang pag-estorya, nagpadala na ang Cebu City Hall og notisya bahin sa business permit nila.
Giklaro sa GM for corporate office nga si Susan Claire Gabuya nga sukad 2012 nagsugod ilang partnership kang Villegas, nipasalig ang ilang kasusyo sa negosyo nga maoy molihok sa mga dokumento lakip na ang mga permit.
Apan nahibaw-an nila niadtong 2016 nga temporary
business permit lang ang naa sila ug walay business permit ang gilihok sa book keeper sa Villegas.
Wala nalang pud gilihok sa kagamhanan sa Rico's ang Panagdait Branch nila tungod kay nahupas na ang ilang kontrata sa abang sa dapit.
Sa pagkakaron, nahuman na nila ang gikinahanglan nga rekisitos sa ilang Axis branch sa dan Escario ug gikatakda nga sunod semana nila kini isumiter sa City Hall.