Liv Superclub apektado
Gitug-an sa operations manager sa Liv Superclub nga si Benray Conti nga dul-an sa 50 porsyento ang pag-us-os sa ilang mga kostumer human nalambigit sa isyu kalabot sa shipment sa drugas gikan China ang pangalan sa usa sa mga tag-iya niini nga si Kenneth Dong.
Kini maoy gipaambit ni Conti sa pakighinabi sa mga tigbalita niadtong Miyerkules sa gabii diin nihimo og pakisusi ang kagamhanan sa dakbayan sa Mandaue sa club.
“Yes, medyo nagdrop yung guest naming eh. Syempre, na aware sila ba. Yung image ng Liv medyo nag- negative. I swear to God malinis kami dito. You can see our security napakahigpit naming dito. Ever since wala pa kaming nangyayaring any illegal transactions sa loob. Wala kayong maririnig, malinis na malinis yung LIV,” matod ni Conti sa mga tigbalita.
Nanghinaot si Conti nga makabangon ra gikan sa isyu ang club tungod kay kon padayon ang pag-us-os sa kostumer o kon wa na unya kini kostumer, mawad-an ug trabaho ang hapit usa ka gatos nga kawani niini lakip na ang mga on-call.
“Hopefully na makarecover kami kase nga wag naman sanang mangyari na magdrop talaga dahil parepareho kaming mawawalan ng trabaho. Pagwala na kaming kostumer eh di wala na kaming trabaho,” dugang ni Conti.
Niadtong Miyerkules sa gabie, mga hiniusang hugpong sa mga kawani gikan sa City Legal Office, City Environment and Natural Resources Office, City Health Office, Office of the Building officials, Bureau of Fire protection ug Mandaue City Police Office ang nihimo sa inspeksyon sa maong bar.
Giklaro ni Conti nga di konektado ang Liv Superclub sa bisan unsang iligal ilabi na ang drugas.
Gani iyang giimbitar ang mga kawani sa anti-illegal drug sa MCPO nga mobisita sa ilang club matag gabie aron mapamatud-an nga limpyo sila gikan sa drugas.
“Kase una sa lahat andito lang kami ng mga tauhan ko na nagtratrabaho ng maayos, walang halong masama ug iligal o anu pa man,” dugang niya.