Di diay sayon
Sa iyang pagpamulong sayo ning buwana sa usa ka forum, giangkon ni Presidente Rodrigo Duterte nga ang drugas di masulbad sulod sa usa lang ka termino sa presidente. Kini nagpasabot nga iyang giangkon nga di niya masulbad ang drug problem sa mosunod nga nahabiling lima ka mga tuig.
Nagtuo si Duterte nga sama sa dakbayan sa Davao, iyang mahimo kini sa tibuok nasod, apan niangkon siya nga nasayop siya sa iyang pagtuo.
Usa sa mga tilimad-on nga di kini sayon sulbaron mao ang pagtumaw sa bag-ong drug players nga ningpuli sa nangadakpan ug napatay na.
Komplikado ang suliran sa drugas. Duna kini ekonomikanhong aspeto kay gihimo kining tinubdan sa panginabuhian, kadaghanan sa mga kabos.
Naa usab kini pulitikanhong nawong tungod kay samtang nagkadugay, daghan sa mga durugista ang nanulod na sa pulitika.
Laing nakagamot sa suliran sa drugas mao ang kurapsyon, labina sa mga awtoridad nga mao untay gitahasan sa pagsumpo niini.
Sa kadugay na sa drug problem, nakagamot na kini og maayo. Ang pagsulbad niini sama sa pagbadbad og nagkabaliburay nga pisi.
Gikinahanglan ang lainlaing mga solusyon, di lang kay paggukod sa mga drug pusher, pagpriso ug pagpatay kanila.
Gikinahanglan nga wagtangon o pagamyon ang kurapsyon. Hatagan og alternatibong panginabuhian ang mga drug pusher ug itanyag nga libre ang drug rehabilitation.
Tingali, ilakip sa mga leksyon sa labing ubos nga ang-ang sa tunghaan ang kadaut nga dala sa drugas, aron matanom na kini sa linghod nga kaisipan sa kabataan.
Pipila lang kini sa mahimo sa kagamhanan ug hayan mas dako pa kini og epekto sa pagsulbad sa illegal drugs kay sa pagpabanaw sa dugo.