Hipuson ang mga druglord

Nahipus na ang mga gikatahapang druglord dinhi sa Visayas ug Mindanao. Una niini mao ang pagpatay kang alyas Jaguar ug ang mayor sa Albuera, Leyte nga si Rolando Espinosa nga gipatay sud sa iyang selda sa prisohan. Napatay usab ang mayor sa Ozamiz City Reynaldo Parojinog uban sa iyang asawa ug mga alalay sa usa ka ronda sa ilang panimay.

Karong bag-o, napatay pinaagi sa pinusilay sa mga pulis ang kauban ra usab nilang pulis nga si PO3 Ryan Martus Quiamco. Gidudahan siyang usa ka drug pusher.

Samtang giimbestigar karon si magpapatigayon Peter Lim. Gani gipaabot nga motestigos batok kaniya mao sila si Kerwin Espinosa ug Franz Sabalones nga giilang mga druglord.

Wa motunga si Lim niadtong Agusto 14 nga imbestigasyon unta didto sa prosecutors office sa kaulohan. Mapasaka ba gud kaha ang sumbong batok kang Lim ngadto sa hukmanan?

Unya nganong si Lim ra man ang giduot sa atong gobiyerno? Unsa na man lang diay si Kerwin ug si Franz? Duna bay pinalabi ang atong mga tinugyanan sa balaud?

Abi kadto nako og mahunong na ang pagpayuhot kun smuggling sa Bureau of Customs (BOC). Migrabe na man hinuon.

Ang atong nahibaw-an niadto ang smuggling lang sa bugas, sakyanan, ug uban paapan dili ingon niini kadaku nga balor sa shabu. Ang na- sakmit mao ang balor og P6.4 bilyones way labut niadtong nakalusot og wa pa hikit-i kon asa na.

Alang kanako pakyas si Customs Commissioner Nicanor Faeldon sa iyang trabaho. Kinahanglan na siya nga mo- resign.

Si Yi Shen Dong nga naila usab sa ngalan nga Kenneth Dong gidakop sa National Bureau of Investigation (NBI) tungod sa kasong pagpanglugos dili sa pagpalusot og 604 kilos sa shabu nga nasakmit sa usa ka bodega sa Valenzuela City.

Si Dong usa usab sa mga tagiya sa Liv Super Club sa Mandaue City. Nahibaw-an usab nga kining maong super club

expired na ang business permit ug wa na magbayad og amusement tax sukad sa 2015. Nakita pa gayud sa city treasurer’s office ang daghang kalapasan sa maong club. Nagsalig ba si Dong nga daghan siyag higala nga mga senador ug ubang dagkung tawo sa gobiyerno?

Usa ka foreigner ang misugilon kanako sa iyang pagdayeg sa mga tinugyanan Land Transportation Office (LTC) nga anaa sa SM City – Cebu.

Ang usa ka dual-citizen nga nagpa- renew sa iyang lisensiya sa maong buhaton midayeg kaayo sa serbisyo ingon man ka pasensiyoso sa mga kawani niini.

Hinaut pang makabasa si LTO Regional Director Alita Pulga niini. Angayan lang silang pahalipayan.