Billy Crawford bagay sa Little Big Shots
Ubay-ubay sab diay ang nakasinati sa akong naasoy dinhi nga nakapaulbo sa akong kaspa sa niaging semana. Kadto bang nag-atang ko sa pagpaso ni Maja Salvador isip Ivy Aguas nga bride in black sa teleserye nga Wildflower unya kalit lang napawng ang kurente.
Usa niini mao si Edith Booc sa Cebu Newscoop. Parehas gyud mig gibati. Kon tigumon ang nakasinatig sapot niadtong higayona, basin makaporma mig Kaspa Unlimited. O-ha!
○○○ Nakahisgot na ko dinhi mahitungod sa sunod nga dalit sa Star Cinema nga I Love You To The Moon and Back nga gibidahan nila ni Joshua Garcia ug Julia Barretto.
Human niini, mosunod sab dayon ang pelikula nila ni Piolo Pascual ug Toni Gonzaga. Mangutana pa ko ni promo diva Josie Pereyra sa hustong ulohan niini.
Samtang sa Agosto 30 na isalida ang I Love You To The Moon and Back, sa Septyembre na usab ang kang Piolo ug Toni. Atong atangan.
○○○ Sa pagsulat nako niini, wa pa ko kabalik sa syudad mao nga nanghinaut ko nga daghan ang nitan-aw sa Patay Na Si Hesus aron makausab kog tan-aw niini. Makalingaw man god.
Kadtong nagpuyo sa habagatan sa lalawigan, seguradong maka- relate kay daghang talan-awon sa mga lugar nga naapil sa pelikula. Mora ni adtong ilang Daniel Padilla ug Kathryn Bernardo nga Can’t Help Falling In Love nga daghan usab nga talan-awon sa Cebu nga gipakita.
Matud sa tagsulat sa Patay Na Si Hesus nga si Patrick, una kini sa trilogy nga iyang ginganlan og Hesus, Maria y Hosep. Bongga!
○○○ Maayong pagkapili sa ABSCBN nga Billy Crawford nga maoy host sa bag-ong programa nga Little Big Shots diin mga bibo ug intelihenteng mga bata ang nangapil.
Maayong moulo-ulo si Billy sa mga bata. May mga facial
expressions usab kini nga nakalingaw di lang sa mga bata kon di apil na usab ang mga tumatan-aw (apil na ko ani).
Duna na sab tay laing atangan kada Sabado ug Dominggo. Mas lingaw pa gani ni kay sa The Voice kay pirme na man god tang makakitag bangga sa pag-awit nga kalagmitan apilan sa mga mag-aawit nga langgis kaayog tingog.
Di kaspa ang moulbo kon di atuli na tungod sa kahait sa tingog. Sakit sa dunggan madugay.
○○○ Di man ko sagad maghisgot sa panag-uyab sa mga artista kay morag ilad ang kadaghanan niini pero nalingaw ko sa pagbutyag ni Boy Abunda nga sila na diay kuno si Rayver Cruz ug Janine Gutierrez. Ana lang!