Well, that was just a lie
Sa pagbiya ni Jude sa resthouse, nag-inusara kong nag-ambo sa terrace. Nag-atubang ko sa lawod. Sa hitsura ni Jude nasabtan ko nga wa gyud siya magmalipayon sa iyang nahimutangan karon. Sala ba gyud kon di mosunod sa kagustohan sa mga ginikanan? Wa ba diay katungod ug kagawasan ang anak nga mopili sa dalan nga gusto niyang subayon?
Nakahibawo ko nga napugos lang si Jude sa pagsunod sa gusto sa iyang parents. Apan unsaon man ning tanan kon layo sa kalipay?
Nakapanghupaw ko. Kapila na kaha ko manghupaw, sukad pa gani sa among pag-estorya ni Jude sa baybayon. Huot ang akong dughan. Duna koy gustong ipagawas nga pagbati sa akong dughan nga dugay ko nang giantos.
Bugnaw na ang huros sa hangin gikan sa lawod. Hapit na mogabii. Misulod ko sa resthouse ug milargo sa kumedor. Nanihapon kog sayo aron makapahuway sab og sayo. Niadtong gabhiona, as usual, sleepness night na sab ang nahitabo nako. Usa tingali ni sa mga rason nga midaot ko. Tagdugay ko makatulog. Dunay naghasol sa akong hunahuna. Apan di ko gusto nga ako ang mahimong hinungdan sa pagkaguba sa usa ka pangandoy.
Ang Mama ug Papa ni Jude dako kaayog tinguha nga mahimong pari si Jude.
Pag-abli sa next semester, mibalik na ko sa among balay sa siyudad. Dunay mga nangulitawo nako. Apan gi- basted ko silang tanan. Nakadesisyon na ko nga di una mosulod og laing relasyon ngadto sa lalaki. Sa akong pagtuo, mapunta gihapon kini sa pagkaway kapuslanan. Aside from that, wa man sab koy nagustohan sa mga nangulitawo nako.
Usa ka gabii, nakamata ko sa kusog nga pagtuktok sa pultahan sa akong kuwarto. Nanglugod ko sa akong mga mata, dayong bangon. Si Mama diay ang nanuktok.
“Ngano, Ma? Lawom na rong gabii, uy.” “Si Jude tua sa ospital.” Wa ko makatingog. Morag gusto kong mohilak sa kaguol. Gitawgan diay si Mama sa selpon sa inahan ni Jude ug maoy nagpahibawo sa nahitabo. Ang tagdumala sa seminaryo maoy nagpahibawo sa mga ginikanan ni Jude.
“Kalit lang kunong natumba si Jude, Susette. Midaot kuno pag-ayo si Jude.”
Niadtong gabhiona, wa na ko makatulog pagbalik. Si Jude ra ang akong gihunahuna. (TAPUSON SUNOD GULA)