PAGARAMOKONTRA OG K.O. PUNCHER
Usa ka knockout puncher ang ikaharong ni ALA fighter Jason Pagara sa iyang pagbalik og away sa undercard sa Pinoy Pride 42: Clash for Glory karong Septiyembre 16 sa Waterfront Hotel and Casino sa Lahug,Cebu City.
Si Pagara, kinsa No.3 welterweight contender sa World Boxing Organization (WBO), makigbatok kang Richmond Djarbeng sa Ghana sa usa ka 10-round non-title bout.
Ang 27 anyos nga si Djarbeng, kinsa kanhi World Boxing Association (WBA) Pan African champion, naggunit og 28-3-1, 22KOs nga rekord.
Katapusang nakatilaw og pilde si Djarbeng niadto pang Hunyo 13, 2015 diin nasugamak siya sa 3rd round TKO batok sa nagbuntog kang Filipino boxing icon Manny Pacquiao nga si Australian Jeff Horn.
Apan human sa iyang kapildihan batok kang Horn, mibangon si Djarbeng ug niposte kini’g walo ka sunodsunod nga kadaugan diin duha ra ka mga kontra ang nakatiwas sa away. Kagahapon sa usa ka luncheon meeting kauban ang mga sakop sa media sa The Park Social sa IT Park, nagkanayon si Pagara nga iya na’ng naistudyohan ang away ni Djarbeng pinaagi sa YouTube.
“Nagtan-aw ko sa iyang mga away sa YuoTube….kaya ra,” matod sa 29 anyos nga si Pagara, kinsa adunay 402,25KOs nga rekord.
“Determinado ko aning awaya. Importante na kay dugay na sab ko wa makaaway.”
Si Pagara katapusang miaway niadto pang Nobiyembre 26 sa miaging tuig sa Cebu Coliseum diin miposte siya og 1st round TKO nga kadaugan batok kang Nicaraguan Jose Alfaro.
Ang trainer ni Pagara nga si Edmund Villamor miangkon nga usa ka lehitimong knockout puncher si Djarbeng apan dako ang iyang pagsalig nga modaog ang iyang batos.
“Naa man siya’y kusog pero kaya ra kaayo kini ni Jason. Basta dili lang gyud mokompiyansa kay pareha bitaw sa nahitabo ni Pacquiao, kinsa man gud ang magtuo nga mapilde siya ni Horn,” pasabot ni Villamor.
Ang away ni Pagara ug Djarbeng nahilakip sa gikaintapang mga parisan sa undercard sa title defense ni International Boxing Federation (IBF) light flyweight champion Milan “El Metodico” Melindo batok kang International Boxing Organization (IBO) light
flyweight king South African champion Hekkie “Hexecutioner” Budler.