Mike, kaubanan gikiha ni Osmeña
Gipasakaan ni Mayor Tomas Osmeña og kasong kriminal ug administratiba sa Ombudsman Visayas si kanhi Mayor Michael Rama ug unom ka mga
department head sa iyang administrasyon gumikan sa paglabay og basura sa lungsod sa Consolacion.
Subay sa reklamo ni Osmeña, ang kanhi mayor, uban sa mga miyembro sa Bids and Awards Committee (BAC) nga silang Dr. Ester Concha, Belinda Navasques, Rolando Ardosa, Conrado Ordesta, Atty. Collin Rosell, Dionesio Gualiza ug Asian Energy Corporation (AEC) nakalapas sa section 3(e) sa Republic Act No. 3019 kun anti-graft and corrupt practices act ug falsification of public document, grave misconduct, serious dishonesty ug gross neglect of duty.
Si Rama, sa iyang bahin, una rang nihagit kang Osmeña nga kon adunay sayop ang ilang gihimo, pasakaan sila og kaso sanglit andam kini nilang tubagon.
Gilatid sa reklamo nga niadtong tuig 2013 ug 2014, ang City Government ubos sa pagdumala ni Rama nilabay og basura sa AEC (landfill) diin giingong gituyo pag-certify ni Gualiza, kanhi pangulo sa Department of Public Services (DPS) nga way laing supplier o service provider gawas sa AEC.
Dugang sa reklamo nga ang BAC wala nihimo og mandatory survey aron pagtino sa certification ni Gualiza ug ang BAC wa nihimo og public bidding inay nihimo og direkta nga kontrata sa AEC balor og P25.4 milyones sa duha ka tuig.
Gipadayag sa mayor nga dili tinuod nga usa ra ang service provider aron kalabayan og basura ug base sa report sa Commission on Audit niadtong Enero 29, 2015.
Naobserbahan sa COA nga adunay laing landfill gawas sa AEC ug ang duha ka procurement sa maong landfill nga wala moagi og public bidding bisan kon adunay laing service provider, nakalapas sa government procurement reform act.