Financial assistance sa seniors sa siyudad sa Sugbo ihatag karon
Magpahiyom na usab nga modawat sa ilang financial assistance karong adlawa ang liboan ka mga senior citizen sa dakbayan sa Sugbo.
Ang Cebu City Government pinaagi sa Department of Social Welfare and Services, City Treasurer's Office ug Office of Senior Citizens Affairs (Osca) manghatag na usab og tag P1,000 ngadto sa 67,300 ka mga lolo ug lola nga benepisyaryo sa ayuda sa siyudad.
Si kanhi konsehal Lea Japson, pangulo sa DSWS, nagkanayon nga andam na ang tanang gikinahanglan alang sa distribution karong adlawa diin motabang sa pagpanghatag ang mga personnel sa lainlaing department kinsa ipadala sa mga barangay.
Matod ni Japson nga kini maoy ika P9,000 nga ilang nahatag ngadto sa mga kwalipikadong benepisyaryo human sila unang nanghatag niadtong buwan sa Pebrero niining tuiga.
Sama sa naandan, ang mga barangay nga gidumala sa mga kapitan nga kaalyado sa Team Rama, ang distribution pagadumalaon sa ilang mga Barangay Mayor's Officer (BMO) ug ang distribution ipahigayon sa dapit diin sila nidawat sa ayuda. Sa barangay Suba, ang distribution adto sa Pasil Elementary School nga pagadumalaon ni Ligglig Marangga, ang sinaligan ni Mayor Tomas Osmeña samtang ang Barangay Sambag-I ang distribution pagadumalaon sa asawa ni Konsehal Jerry Guardo nga si Ailien sa Cebu City Sports Complex.
Sa kinatibuk-an, ang 67,300 ka mga senior citizen sa Cebu City nga kwalipikadong makadawat sa hinabang makadawat og P12,000 hangtod sa buwan sa Disyembre.