BINUKBOKAY SA SAWANG CALERO

Saktong binukbokay ang gilaumang masaksihan karong gabii sa pagpahigayon sa ‘Cebu Extreme Fight League: Respect’ fightcard sa Cebu City Sports Institute in Barangay Sawang Calero, Cebu City.

Ang beteranong striker nga si Tonix ‘Silent Killer’ Borres sa JB Dream Fitness Gym makigbatok sa dekalidad nga grappler nga si Cipoz ‘Aquaman’ Guadez sa CITI BJJ amateur mixed martial arts (MMA) bantamweight division.

Nagkanayon si Borres nga ipagawas niya ang tanan niyang makaya aron protektahan ang iyang wala’y pildeng rekord.

Matod ni Borres nga gusto siya nga inig saka niya sa professional rank, magpabiling limpyo ang iyang rekord.

“Nindot ning awaya kay lainlain og style. Ang makahimo sa iyang game plan maoy dako’g chance nga modaog,” matod ni Yaw-Yan ArDigma CEO/Founder Master Benigno ‘Ekin’ R. Caniga Jr., kinsa maoy nagpaisugda sa promosyon.

Sa weigh-in kagahapon, ang duha ka fighters parehong mitimbang og 135 lbs.

Sa supporting main event, magsangka sila si Nigerian Simon Uchenna sa Yaw-Yan ArDigma batok knockout artist Rodel ‘Pitbull’ Valisado sa Tatus Muay Thai.

Ang ubang mga parisan mao ang tali nila ni Jhon Agustin Simbahon batok Christian Villanueva, Allan Albindo batok Arnel ‘Assassin’ Bitoy, Clint Jun Bahala batok Jaymar Cunelitan, Alex ‘Swagger’ Calderon batok Joel Jabonero, Giovanie Macasling batok Mark Tapales, John Edu Torbiso batok Samuel Gumaya, Clark Stevenson Caneja batok Reymond Jakosalem, Diosdado Booc batok Jowargen Limpangog, ug Michael Rebayos batok Marvin Rabanos.

Ang mga tiket nagkantidad og P700 -cage side, P500-VIP ug 200-upperbox.