GOLD SA HOCKEY
Nakabaton og gold medal ang Pilipinas sa 2017 Southeast Asian Games sa Kuala Lumpur Malaysia sa usa ka natad sa paugnat sa kusog nga dili pamilyar sa mga Pinoy-- ice hockey.
Ang Philippine ice hockey team miharos pagdaog sa tanan nilang tahas sa 5-team competition sa Empire City Ice Arena niadtong Huwebes sa gabii aron isaka ang gidaghanon nga nahakot nga gold medals sa Pilipinas ngadto sa 15.
Kini maoy labing unang higayon nga gilakip ang ice hockey sa matag duha ka mga tuig nga kompetisyon.
Sa labing ulahi nilang duwa, gipukan sa mga Pinoy ang Thailand, 5-4.
Ang Pilipinas nakahakot og tulo ka goals sa 1st period gikan ni Benjamin Imperial ug duha kang Paul Sanchez.
Sa 2nd quarter, nakadugang og usa ka goal ang Pilipinas gikan ni Francois Gautier apan human niini, nakamugna og tulo ka sunodsunod nga goals ang Thailand.
Nahimo kini sa RP team bisan wala ang ilang team captain nga si Steven Fuglister, kinsa nagsagubang og suspensyon human na-ejected sa 8-7 nga kadaugan batok sa Malaysia niadtong Miyerkules.
Ang laing mga nakadugang og gold medals sa Pilipinas mao sila si Eumir Felix Marcial ug Filipino-British John Marvin sa boksing.
Gilupig ni Marcial ang Thailander nga si Pathomsak Kuttiya pinaagi sa unanimous
decision sa middleweight class samtang impresibong kadaugan maoy naangkon ni Marvin human niya paundanga si Adli Hafildz B. Mohn Pauzi sa host Malaysia sulod lang sa 21 segundos sa first round alang sa light heavyweight gold.
Si Mario Fernandez igo lang naka- silver medal sa bantamweight division human kini mapildi sa Thailander nga si Chatchai Butdee.
Naka-bronze ang Pilipinas sa women’s karate, kortesiya nila ni Mae Soriano, June Tsukii, Kimverly Madrona ug Erica Celine Samonte.
Sa kinatibuk-an, ang Philippine Karate team, wa man tuoy gold medal apan nakahagdaw na kini og tulo ka silvers ug upat ka bronze.
Laing bronze medal sa Pilipinas nagagikan sa tennis women’s doubles nga nakuha nila ni Denise Dy ug Katharina Lehnert.
Ang Pilipinas aduna na karoy 65 ka medalya - 15 golds, 19 silvers ug 35 bronzes.
Kagahapon, ang women’s volleyball team napildi sa Vietnam, 24-26, 12-25 ug 23-25.
Apan bisan pa man sa kapildihan, ang Pilipinas makalabni gihapon og lingkuranan sa semifinals round human ang host Malaysia napildi sa ilang mga duwa sa elimination
round sa group stages. Ang Pilipinas makigsangka sa top seed sa Group A nga mao ang Thailand karong buntag.
Samtang ang Perlas Pilipinas yanong midabo-dabo sa Vietnam pinaagi sa paglubong niini og 74 puntos, 118-44, aron pagbuhi sa ilang paglaom nga makauli nga may dalang medalya.
Ang mga Pinay dribblers adunay 4-2 nga baraha ug mahibaw-an ang ilang ranking sa women’s basketball kon mahuman na unya ang tanang duwa sa elimination phase.
Posibling makontra niini alang sa bronze medal mao ang Thailand og Malaysia.