Binaril nga pundong krudo sa Capitol compound gisusi sa Fire Department

Gitahasan sa labaw sa Bureau of Fire Protection ang Cebu City Fire Department pagsusi sa lugar nga gibutangan sa baril nga dunay sulod nga krudo sa Provincial Disaster Risk Reduction and Management Office sa Capitol compound, siyudad sa Sugbo.

Buot ni Fire/Sr. Supt. Samuel Tadeo, regional director sa BFP 7, nga masiguro ang kaluwas sa lugar gumikan sa gipundo nga krudo. Dugang niya nga kinahanglan layo kini sa buhatan sa PDRRMO aron paglikay sa disgrasya.

Ipasiguro sa direktor nga dunay fire extinguisher sa duol sa butangan sa mga krudo o

signages sama sa gidili ang pagpanigarilyo, pagdaub ug ubang kalihukan nga mahimong hinungdan sa sunog o aksidente. Si Julius Regner, information officer sa PDRRMO, nibutyag nga desidido ang ilang buhatan nga kasohan si Erwin Chua, kinsa nasakpan nga nikuha sa usa ka baril nga hapit mapuno sa krudo. Matag baril nga puno og diesel giingong magkantidad og P8,000.

“Mo- file gyud ta og case kay lisod na kaayo maanad, atong patagmon,” pahayag niini.

Si Chua sa pagsulod sa Capitol compound, nagpailang kabanay nga kawani sa Department of Justice nga nagtrabaho sa Palace of Justice.

Iyang giparada ang iyang gray nga Pajero nga may plate

number GJN 185 gawas sa buhatan sa PDRRMO ug nagpakaaron-ingnon nga mangihi. Sa kuha sa closed-circuit television (CCTV) camera niadtong Miyerkules sa gabii, sa pagtuo nga way nakakita niya, si Chua niirog sa blue nga baril nga gisudlan og diesel gikan sa nahimutangan niini duol sa buhatan sa PDRRMO.

Iyang gipatumba ang baril ug gipaligid ngadto sa luyo sa iyang sakyanan.

Sa dihang padung na mobiya si Chua, gisundan kini nila ni Rhaffy Luche, pangu sa

emergency response sa PDRRMO ug Dennis Chiong ug gipugngan nga makalakaw.

Iya kining gibuhat samtang busy ang mga opisyal ug kawani sa Kapitolyo sa Gabii sa Sugbuanon diin nihatag og Summary Report si Gobernador Hilario Davide III.

Si Chua gidala sa mga sakop sa Civil Security Unit sa Kapitolyo sa Fuente Police Station.

Nabantayan ni Luche nga ang sakyanan ni Chua susama og hitsura sa sakyanan nga gisakyan sa laing baril.