Leksiyon sa Team Rama

Sa dili madugay, gikatakda nga moluwat na sa iyang katungdanan isip konsehal sa dakbayan sa Sugbo si Nendell Hanz Abella. Kini aron pag-asumir isip commissioner sa 7th Division of the National Labor Relations Commissioner nga ubos sa Department of Labor and Employment (DOLE) 7.

Wa palabya ni Konsehal Abella ang kahigayonan kay gawas nga may igo siyang kasinati-an sa trabaho niini, mas aduna usab siyay seguridad sa iyang position nga sukwahi sa usa ka konsehal nga mag-agad lang kon modaog sa matag election.

Pero ang makapaikag niining wa damhang pagluwat unya ni Abella sa pagka konsehal mao ang gipaabot nga kausaban na usab sa kamada sa mayoriya sa konseho.

Si Abella, bisan tuod og anaa na ang iyang simpatiya sa Bando Osmeña Pundok Kauswagan (BOPK), apan atol sa piniliay didto kini nagpalandong sa partido Team Rama nga gisagop sa United Nationalista Party (UNA).

Buot ipasabot ang Team Rama maoy adunay gahom sa pagpili og kinsay ilang ipuli ni Abella.

Sa pagkakaron, ang BOPK nga may siyam ka mga sakop, lakip na sila si Konsehal Dave Tumulak ug Jerry Guardo nga mga kanhi usab sa Team Rama. Sa pagkawagtang na unya ni Abella ma walo na lang ang BOPK ug sa paghidugang na unya sa mopuli ni Abella mosiyam na pod ang Team Rama.

Pagka alegre. Nagbali-bali ang pabor. Pero dili angay pa nga magmaya ang Team Rama ning maong kalambuan.

Sila sayod nga dili sila lung-an ni Mayor Tomas Osmeña hangtod nga makuha og balik ang mayoriya.

Ang angay nilang buhaton karon mao ang pagkat-on og leksyon kon unsaon nga di na maagni ang ilang kaubanan ngadto sa pikas kampo.

At least, nahashasan na ug nahibawo na usab sila karon ug kinsa gyud ang anaa kanila.